Жетпістен асқан шағында жаңа мамандық игеріп, жоғары оқу орнын аяқтаған тараздық Валентина Проскурина көпшілікке үлгі болды. Шерхан Мұртаза атындағы Халықаралық Тараз университетінде өткен салтанатты іс-шарада ол «Құқықтану» мамандығы бойынша екінші жоғары білімінің дипломын иеленді, деп хабарлайды El.kz интернет порталы.
Валентина Павловна – саналы ғұмырын бухгалтерлік есеп пен қаржы саласына арнаған тәжірибелі маман. Экономика бағытында алғашқы жоғары білімін алған ол бірнеше онжылдық бойы мемлекеттік және жеке секторда табысты еңбек еткен. Сонымен қатар авторлық 20-дан астам оқу құралы мен әдістемелік нұсқаулықтары бүгінде еліміздің жетекші жоғары оқу орындарының оқу үдерісінде кеңінен қолданылады.
Құқық саласына бет бұруды ол өмірлік қажеттілікпен байланыстырады. Өзінің айтуынша, қазіргі заман талабын түсіну, құқықтық сауатты болу және отбасылық, әлеуметтік өмірде заң аясында бағдар табу бұл қадамға бастау болған.
Білім алуға ешқашан кеш емес. Армандар жаспен шектелмейді. Ең бастысы – ниет пен табандылық, – деді Валентина Павловна диплом табыстау кешінде.
Ол оқытушыларға алғысын білдіріп, жастарды білім мен еңбекке ұмтылуға шақырды.
Айта кетейік, университет қабырғасында ол тек білім алушы ғана емес, жас буынға бағыт-бағдар беретін рухани ұстаз ретінде де танылған. Өзінің өмірлік тәжірибесін бөлісіп, студенттер мен оқытушылардың құрметіне ие болды.
Мұндай жағдай тек облыс көлемінде емес, елімізде және әлемде де өте сирек кездеседі. Әлемдік тәжірибеде де бұл – ерекше жағдай. Мәселен, Гиннестің рекордтар кітабы бойынша ең қарт университет түлегі – жапониялық Сигэми Хирата.
Посмотреть эту публикацию в Instagram
Публикация от EL.KZ (@elkz_portal)
