Жоғарғы соттың хабарлауынша, «BizBirgemiz Qazaqstan» қорының жетекшісі Перизат Қайратқа қатысты қылмыстық іс қоғам тарапынан жоғары қызығушылық тудырса, сот процесін тікелей эфирде көрсету мәселесі қарастырылуы мүмкін, деп хабарлайды Skifnews.kz ақпарат порталы.
«Перизат Қайратқа қатысты соңғы қылмыстық іс сотқа түсті. Қоғам мен заңгерлер қауымынан тікелей эфирде көрсетілуіне қатысты нақты сұраныс болса, сот отырысын онлайн форматта өткізу мүмкіндігі қаралады», — делінген Жоғарғы соттың ресми жауабында.
Еске сала кетейік, Перизат Қайрат бюджет қаржысын жымқыру фактісі бойынша күдікке ілініп, уақытша қамауға алынған. Тергеу барысында бұл іске байланысты 100-ге жуық адамнан жауап алынған. Қылмыстық іс бойынша басты күдіктілердің қатарында Қайраттың анасы — Ғайни Алашбаева да бар.
Соңғы жылдары Қазақстанда қоғамның назарын аударған екі ірі сот процесі тікелей эфирде көрсетілген. Оның бірі — экс-министр Қуандық Бишімбаевқа қатысты іс болса, екіншісі — Шерзат Полаттың өліміне байланысты өткен сот.
