19 маусым күні Павлодар облысының Ақсу қаласында соққан күшті дауылдан кейін қаланы қалпына келтіру жұмыстары қарқынды жүргізіліп жатыр, деп жазады Egemen.kz.
Табиғи апат салдарынан 7970 абонент жарықсыз қалған болатын. Қазіргі таңда тұрғын үйлер мен әлеуметтік нысандардың 97 пайызына электр қуаты қайта қосылды.
Зақымданғандар қатарында 61 көпқабатты тұрғын үй, 102 жеке үй, 16 әлеуметтік мекеме мен 48 ұйым бар. Қатты желдің салдарынан 250-ден астам ағаш құлаған. Қаланың тазалығы мен қауіпсіздігін қамтамасыз ету үшін коммуналдық қызметтер тәулік бойы жұмыс істеп жатыр.
Қалпына келтіру жұмыстарына 1500-ден астам маман мен 30-дан аса арнайы техника жұмылдырылып, бүгінге дейін 1700 тоннадан астам қоқыс шығарылды.
Тиісті қызметтер апат салдарын толық жою бағытында жұмыстарды жалғастырып жатыр.
