Оралдық дәрігерлер 13 жасар қыздың асқазанынан жарты келі шаш алып шықты, деп хабарлайды "Астана" арнасы.
Науқасқа ота жасаған мамандар мұндай жағдайдың алғаш рет кездескенін айтады. Анасы қызының соңғы кезде тамаққа тәбеті нашарлап, өзін жайсыз сезініп жүргенін байқайды. Кейін емханада тексерткенде асқазанында әлдебір зат тұрғаны анықталыпты. Бір сағатқа созылған ота кезінде дәрігерлер оның ішінен бір уыс ұйысқан шашты алып шықты.
"Анасы 3-4 жыл бұрын байқаған. Негізі құрттай кезінен саусақтың тырнағын жейтін әдеті бар екен. Енді оны әрі қарай психологтар сөйлесіп шешеді ғой. Қазір енді науқастың жағдайы тұрақты. Әзірге тамақты ішпейді, қажетті емін алып жатыр, — дейді БҚО көпбейінді балалар ауруханасы хирургиялық бөлімнің меңгерушісі Әліби Төлегенов.