Бір ғана Қаратал өзенінде екі бірдей бала суға кетіп, елді есеңгіреткен ауыр оқиғалар тіркелді, деп хабарлайды Skifnews.kz ақпарат порталы.
Алғашқы қасірет Үштөбенің маңында орын алды. 2018 жылы туған қыз бала отбасымен табиғат аясында демалып жүргенде, Қаратал өзеніне батып кеткен. Жүзуге тыйым салынған белгілерге қарамастан, бала суға түскен. Құтқарушылар шақырту алған соң, небәрі жарты сағатта денесін судан алып шықты. Бірақ бұл қасіреттің соңы емес еді…
Дәл сол күні, дәл сол өзеннің басқа тұсында – Қожбан ауылында тағы бір суға бату оқиғасы тіркелді. Бұл жолы – 17 жастағы жасөспірім. Алдын ала мәлімет бойынша, ол абайсызда суға құлап, ажал құшты. Марқұмның денесін жергілікті тұрғындар өздері тауып алды.
«Екі жағдай да шомылуға арналмаған жерлерде болды. Біз су маңындағы қауіпсіздік шараларын үнемі жүргізіп, рейдтер өткізіп келеміз. Бірақ өкінішке қарай, мұндай қайғылы жағдайлар қайталануда. Әсіресе балалармен су жанына барған кезде, ата-аналар аса мұқият болуға тиіс», — деді Жетісу облысы Төтенше жағдайлар департаментінің баспасөз қызметі.
