Қазақстан жасанды интеллект саласында өңірлік хабқа айналуды мақсат етіп отыр. Осы бағыттағы ірі бастамалардың бірі – Alem.AI халықаралық жасанды интеллект орталығының құрылуы. Жобаның басты мақсаты, құрылымы және болашақтағы рөлі туралы цифрлық даму, инновациялар және аэроғарыш өнеркәсібі министрі Жаслан Мәдиев Baq.kz YouTube-каналына берген сұхбатында айтты, деп хабарлайды El.kz интернет порталы.
Alem.AI – жасанды интеллекттің барлық кезеңдерін біріктіретін бірегей орталық
Мемлекет басшысының тапсырмасына сәйкес, 2025 жылы іске қосылатын бұл орталық EXPO аумағындағы сегіз қабатты шар пішінді заманауи ғимаратта орналасады. Әр қабат жасанды интеллекттің даму жолындағы нақты бір сатыны қамтиды – қоғаммен жұмыс істеуден бастап, ғылыми зерттеулер мен мемлекеттік басқаруға дейінгі барлық процесті тоғыстырады.
Бұл – архитектурасы мен мазмұны жағынан бірегей жоба. Alem.AI орталығы жасанды интеллект индустриясын жедел дамытуға, ғылыми зерттеулерді қолдауға және өнімдерді коммерцияландыруға бағытталады. Жоба жасанды интеллектке қызығатын жастарға, кәсіпкерлерге, ғалымдарға және мемлекеттік сала өкілдеріне ортақ алаң болады, — деді Жаслан Мәдиев.
Орталық EXPO аумағындағы сегіз қабатты ғимаратта орналасады. Бірінші қабат – ашық қоғамдық кеңістік, мұнда форумдар, хакатондар, көрмелер өтеді. Мақсат – жыл сайын 10 000 адамды ЖИ саласына тарту.
Екінші және үшінші қабаттарда 14-18 жас аралығындағы оқушыларға арналған TUMO School жұмыс істейді. Бұл жерде бағдарламалау, анимация, робототехника секілді бағыттар оқытылады.
Төртінші және бесінші қабаттар – Tomorrow School, мұнда студенттер peer-to-peer форматында, жобалық оқыту әдісімен бағдарламалау мен ЖИ саласының қыр-сырын меңгереді.
Алтыншы қабат – стартаптарды қолдау орталығы. Жыл сайын кемінде 100 жасанды интеллект негізіндегі жоба нарыққа шығады. Мысалы, мәтіннен видео жасайтын Higgsfield платформасы $8 млн инвестиция алды.
Жетінші қабат – ғылыми зертханалар. Мұнда робототехника, денсаулық сақтау, табиғи тілді өңдеу сияқты бағыттарда зерттеулер жүргізіледі.
Сегізінші қабат – ЖИ және мемлекет, мұнда жасанды интеллект мемлекеттік басқаруда қолданылады. Gov AI жобалық офисі мен Жедел ахуал орталығы қызмет етеді.
Жасанды интеллектті мемлекеттік басқару жүйесіне кеңінен енгізу арқылы біз шешім қабылдау процесінің сапасын арттыруды, проактивті цифрлық сервистерді дамытуды және дағдарысқа жедел әрекет ету мүмкіндігін қамтамасыз етуді көздеп отырмыз. Бұл мемлекеттік қызметтің тиімділігін жаңа деңгейге көтереді, — деп қорытындылады министр.
Бұған дейін министр Қазақстанда 1 миллион адам жасанды интеллект бойынша білім алатыны туралы айтқан.
