Қасым-Жомарт Тоқаев 2025 жылғы 17 маусымда Қазақстан Республикасы, Қырғыз Республикасы, Тәжікстан Республикасы, Түрікменстан, Өзбекстан Республикасы мен Қытай Халық Республикасы арасындағы мәңгілік тату көршілік, достық және ынтымақтастық туралы шартқа қол қою туралы жарлыққа қол қойды.
Жарлық мәтінінде былай делінген:
- Қазақстан Республикасы, Қырғыз Республикасы, Тәжікстан Республикасы, Түрікменстан, Өзбекстан Республикасы мен Қытай Халық Республикасы арасындағы мәңгілік тату көршілік, достық және ынтымақтастық туралы шарт жобасы мақұлдансын.
- Қазақстан Республикасы, Қырғыз Республикасы, Тәжікстан Республикасы, Түрікменстан, Өзбекстан Республикасы және Қытай Халық Республикасы арасындағы мәңгілік тату көршілік, достық және ынтымақтастық туралы шартқа Қазақстан Республикасының атынан қол қойылсын.
Шартқа сәйкес, тараптар халықаралық құқықтың жалпыға танылған қағидаттары мен нормаларына сүйене отырып, егемендік пен аумақтық тұтастықты өзара құрметтеу, шабуыл жасамау, ішкі істерге араласпау, теңдік, өзара тиімділік және бейбіт қатар өмір сүру қағидаттарына негізделген ұзақ мерзімді және берік стратегиялық серіктестік қатынастарды жан-жақты дамытатын болады.
Тараптар күш қолданбау немесе күшпен қорқытпау, дауларды бейбіт жолмен шешу туралы өзара міндеттемелерін растайды.
Қатысушы мемлекеттер өзара сенімді және стратегиялық әрекеттестікті нығайтып, әрқайсысының ұлттық ерекшеліктеріне сәйкес даму жолдары мен үлгілерін таңдауға қолдау көрсетеді, маңызды мәселелер бойынша бірін-бірі қолдайды, экономикалық даму стратегияларын жүзеге асыруда ынтымақтасады.
Мемлекеттік егемендік пен аумақтық тұтастық қағидаттарын құрметтей отырып, тараптар өз аумақтарында бұл қағидаттарға қайшы келетін кез келген қызметке жол бермеу шараларын қабылдайды.
Тараптар бір-біріне қарсы бағытталған одақтарға немесе блоктарға қатыспайды және бір-біріне қарсы бағытталған әрекеттерді қолдамайды.
Тараптар теңдік пен өзара тиімділік қағидаттарына сүйене отырып, сауда, экономика, инвестиция, инфрақұрылымдық байланыс, инженерия, энергетика (гидроэнергетика мен жаңартылатын энергия көздерін қоса алғанда), көлік, пайдалы қазбалар, ауыл шаруашылығы, қоршаған ортаны қорғау, өңдеу өнеркәсібі, ғылым мен техника сияқты салаларда және өзара қызығушылық тудыратын басқа да бағыттарда ынтымақтастықты дамытуға дайын екендерін білдіреді.
Сондай-ақ мәдениет, білім, денсаулық сақтау және медициналық қызметтер, туризм, спорт, бұқаралық ақпарат құралдары және өзара қызығушылық танытатын басқа да салаларда алмасу мен ынтымақтастықты дамыту шаралары қабылданатыны айтылған.
Тараптар ұлттық заңнамалары мен халықаралық міндеттемелеріне сәйкес терроризмге, сепаратизмге, экстремизмге, трансұлттық ұйымдасқан қылмысқа, заңсыз көші-қонға, қару мен есірткі, психотроптық заттар мен олардың прекурсорларының заңсыз айналымына қарсы күрес бойынша екіжақты және көпжақты форматтарда ынтымақтастықты дамытады.
Шарт белгісіз мерзімге жасалады және күшіне ену үшін тараптардың ішкі мемлекеттік рәсімдерін орындағаны туралы соңғы жазбаша хабарламаны депозитарий дипломатиялық арналар арқылы алған күннен бастап күшіне енеді.
Аталған Шарттың депозитарийі – Қытай Халық Республикасының Сыртқы істер министрлігі.
Келісімнің толық мәтінімен сілтеме арқылы танысуға болады.
Шарт 2025 жылғы 17 маусымнан бастап күшіне енді.
