Қазақстан Республикасының Премьер-министрі Олжас Бектенов 520 метр тереңдікке түсіп, шахтерлердің жұмыс жағдайын өз көзімен көрді, деп хабарлайды Zakon.kz.
Үкімет алдына қойылған басты міндеттердің қатарында — Қазақстан Президентінің тапсырмаларын жүзеге асыру, атап айтқанда, өнеркәсіптік дамуды ілгерілету, экономиканы әртараптандыру, терең өңдеуге басымдық беру, энергетикалық инфрақұрылымды және агроөнеркәсіптік кешенді дамыту бар. Осыған байланысты премьер-министр Қарағанды облысындағы "Saran" индустриялық аймағындағы кәсіпорындарды, сондай-ақ "Qarmet" АҚ-ның өндірістік нысандарын — металлургиялық комбинатты және "Саранская" шахтасын аралады.
Жұмыс сапары аясында үкімет басшысы "Саранская" шахтасындағы еңбек қауіпсіздігімен танысты. Ол үшін премьер-министр шахтерлермен бірге жер астына 520 метр тереңдікке түсіп, өңдеу учаскелерін аралады.
Олжас Бектеновке "Qarmet" АҚ-ның Көмір департаментінің директоры Жақан Мұхамеджанов ілесіп жүрді. Ол персоналды позициялау жүйесінің енгізілгені туралы айтып берді. Бұл жүйе халықаралық стандарттарға сай әзірленген және шахтерлердің нақты уақыт режимінде қайда жүргенін бақылап, төтенше жағдайлар кезінде жедел шешім қабылдауға мүмкіндік береді.
Бұл технологиялар қауіпсіздік шараларын күшейтіп, оқыс оқиғаларға жылдам әрекет етуге жол ашады.
Сонымен қатар премьер-министрге шахтада жұмыс істеп жатқан жұмысшылармен тікелей бейнебайланыс арнасы көрсетілді — бұл да қауіпсіздік деңгейін арттыруға бағытталған.
Шахтадағы жаңғырту бағдарламасы шеңберінде өңдеу жабдықтарын жаңарту, желдету жүйесін жетілдіру, сондай-ақ жер асты жұмыстарында өрт қауіпсіздігін күшейту жоспарланып отыр. Олжас Бектенов шахта жұмысшыларымен әңгімелесіп, жерасты цифрландыруына көшу маңыздылығын атап өтті.
Шахтерлермен әңгіме барысында премьер-министр өндірісті цифрландыруға бейімделу мәселелерін көтерді. Олжас Бектенов басқа шахталарда да осындай жүйелерді жедел орнату қажеттігін айтты.
Сондай-ақ, ұқсас технологиялар өзге көмір шахталарында да енгізілетінін, бұл еңбек қауіпсіздігін арттыруға мүмкіндік беретінін жеткізді. "Qarmet" компаниясының көмір кәсіпорындарын жаңғыртуға бағытталған жалпы инвестиция көлемі шамамен $500 миллионды құрайды.
