Бар-жоғы 2-3 сағатта жетуге болатын үш жеңіл бағытты ұсынамыз.

Жазда қалада күн ыстық болғанда тауға шығып сергіп қайтуға болады. Алматыда тау жап-жақын болғанымен кейбіреулер қайда барарын білмей жатады. Осы орайда Информбюро порталы тауға көп шықпайтын не енді бастағандарға Медеу мен Шымбұлақ айналасындағы бағыттарға тез әрі қиналмай қалай жетуге болатынын айтады.

"Ақбұлақ" аялдамасы – Мохнатка

Мохнатка тауы бөгеттің үстінде орналасқан. Ол оң жақтан анық көрінеді. Бұл жерден тау курортының әсем панорамасы ашылады. Ал бинокльмен қараса көрініс одан да әсерлі бола түседі.

Маршрут "Ақбұлақ" аялдамасынан басталады. Алдымен асфальт жолмен жүріп, соңына жетпей солға бұрылу керек. Бұдан әрі жол бойында орнатылған бағыттаушы белгілерге назар аударыңыз. Аса биік емес өткелге жеткен соң тағы да солға бұрылу қажет. Маршрут жеңіл әрі жаңадан бастаушыларға қолайлы. Қайтар жолда келген бағытпен төмен түсіңіз.

Талғар асуы (3200) – Шымбұлақ шыңы

Бұл бағыт Талғар асуынан басталады. Комби-2 арқан жолымен көтерілген соң солға қарай бұрылу қажет. Соқпақ жол жақсы көрінеді, соның бойымен жүре беріңіз. Көтерілген сайын тау жоталары мен шатқалдардың әсем көрінісі ашылады.

Бағыт бойы күрделі учаскелер жоқ, бірақ биіктікке бейімделу маңызды. Маршруттың соңғы нүктесі – Шымбұлақ шыңы. Ол жерде арнайы бағдарлық белгі орнатылған. Дәл сол бағытта қайтасыз.

Оқи отырыңыз: "От жақсаңыз – айыппұл 300 мың теңге". Тауға шығарда білу қажет 20 бап

Медеу – Серікбай жотасы

Маршрут "Медеу" базалық станциясынан басталады. Арқан жол бағытымен жүрген соң ақпараттық орталықтың жанынан өтіңіз. Содан кейін қайың орманына кіріп, саты жолмен жоғары көтерілесіз.

Жол бойында бағдар белгілері орнатылған, сондықтан адаспайсыз. Орманнан өткен соң жота басталады. Жол сәл тік болғанымен, аса қиын емес. Жота бойымен жүргенде бір жақтан Медеу шатқалының, екінші жақтан Абай шыңының сұлулығы көрінеді.

Қызыл күркеден кейін де тоқтамай Серікбай жотасына қарай көтеріліңіз. Жотаның ең жоғары нүктесінде арнайы белгі болмаса да, тегіс жер мен айнала межелі жерге жеткеніңізді білдіреді.