Мамандардың айтуынша , сот кәсіпкердің өзін емес, оның атына тіркелген жауапкершілігі шектеулі серіктестікті борышкер деп таныған.
Қызылордада бір топ тұрғын баспана салуға қажетті құрылыс материалына толық ақы төлеп, бірақ кірпішсіз қалғанын айтып, шағымдануда. Олардың айтуынша, күйдірілген қыш сатып алу мақсатында кірпіш зауытының басшысына қомақты қаражат тапсырған. Алайда кәсіпкер екі жылдан бері уәде етілген материалды жеткізбеген, деп хабарлайды 31-арнаның "Информбюро" ақпараттық агенттігі.
Зардап шеккен азаматтардың айтуынша, олар екі жыл бұрын үйлерінің іргетасын құйып, қабырғаларын қалау үшін зауытпен келісім жасасқан. Бар үмітпен бір жапырақ келісімшартқа сүйеніп, төлемді толық көлемде қолма-қол берген.
"Әне-міне жеткіземіз деп сендіріп келді. Бірақ кейін зауыт басшысы ізім-ғайым жоғалды", – дейді тұрғындар.
"Мен өзім 30 мың қыш үшін 1 миллион 400 мың теңге бердім. Бізбен бірге 2,2 миллион теңге, 865 мың теңге төлегендер де болды. Содан бері не кірпіш жоқ, не ақшам жоқ", – деді Қызылорда облысының тұрғыны Достияр Сейітжаппаров.
Оқи отырыңыз: "300 мың оқушы қайда барады?". Мәжіліс депутаты жекеменшік мектептердің "жабылуына" алаңдаушылық білдірді
"Тұрғындар кірпіш зауытына бірнеше рет келгендерін айтады. Бірақ басшы да, жұмысшылар да табылмаған. Қазір де зауыт бос, ешкім жоқ".
Кәсіпкердің әрекетінен шаршаған тұрғындар сотқа жүгінген. Сот азаматтық іс бойынша сатып алушыларға ақшаны қайтару туралы шешім шығарған. Алайда бұл шешім де орындалмай отыр.
"Сот орындаушыға бергеніме 7 ай болды. Не жауап жоқ, не нәтиже жоқ. Шағымданбаған жерім қалмады. Тіпті сот орындаушылардың өздеріне де шағымдандым. Бірақ біз хабарлассақ, тек ЖСН сұрап қоя салады", – деді Қызылорда облысының тұрғыны Елжас Кенжеәлиев.
Зауыт иесін таба алмаған журналистер де байланысқа шыға алмады. Ал Қызылорда облысы Әділет департаменті бұл мәселеге қатысты түсініктеме берді.
"Соттың шешіміне сәйкес, жеке сот орындаушылары заң талаптарына сай мәжбүрлеп орындату шараларын қолдануда. Яғни серіктестіктің есепшоттарына тыйым салу, инкассалық үкімдер қою сияқты шаралар жүргізіліп жатыр", – деді Қызылорда облысы Әділет департаментінің бөлім басшысы Жандос Абсат.
Мамандардың айтуынша, сот кәсіпкердің өзін емес, оның атына тіркелген жауапкершілігі шектеулі серіктестікті борышкер деп таныған. Сол себепті тек заңды тұлғаның мүлкіне ғана бұғат қоюға мүмкіндік бар.
Алайда тұрғындар әділеттілік орнап, зауыт иесінің жеке жауапкершілікке тартылуын талап етуде.
Оқи отырыңыз: "Су да іше алмай отырмыз". Маңғыстау облысында тұрғындар қара қоңыздың қаптағанына шағымданды
