Бұл сыйлық оған оқыған жекеменшік мектебінің бастамасымен табысталды.
Алматылық мектеп түлегі Айша Сатыбалды Ұлттық бірыңғай тестілеуден (ҰБТ) ең жоғары көрсеткіштердің бірін – 140 балл жинап, пәтер иесі атанды, деп жазады inbusiness.kz сайты.
– 140 балл алғаныма әлі де сене алмай жүрмін. Негізгі мақсатым – 130 балдан асу еді. Мұндай нәтижеге қол жеткіземін деп күтпедім. Дайындыққа екі жыл уақытымды арнадым: 10-сыныпта ағылшынға, 11-сыныпта тарих пәніне ден қойдым. Ұйқысыз түндер мен қобалжу болды, бірақ тест тапсыру өзім ойлағаннан жеңіл өтті, – деді Айша қуанышымен бөлісіп.
Айша болашақта ағылшын тілі пәнінің мұғалімі болуды армандайды. Ол Сүлеймен Демирель университетіне "Екі шет тілі" мамандығы бойынша оқуға түсуді шешкен. Сонымен қатар магистратураны шетелде жалғастыру ниеті бар.
Айша Алматыда дүниеге келген. Бастапқыда мемлекеттік мектепте білім алған, кейін жекеменшік мектепке ауысқан. Отбасында үйдің үлкені – артынан ерген екі інісі бар. Пәтер кілтін алған сәтте қуаныштан көзіне жас алып, ұстаздары мен жақындарына алғысын жеткізді.
Мектеп директоры Мұхит Нәметқұловтың айтуынша, биыл 147 оқушы мектепті тәмамдаған. Олардың басым бөлігі 100 балдан жоғары нәтиже көрсеткен. 15 түлек – үздік аттестатпен, 9-ы – "Алтын белгімен" марапатталған.
– Жыл басында мектеп құрылтайшысы ең жоғары балл жинаған оқушыға пәтер сыйлауға уәде берген еді. Бұл бастама оқушыларға үлкен мотивация болды. Меніңше, жоғары нәтижеге деген талпыныс пен осындай ерекше сыйлық алу мүмкіндігі шешуші рөл атқарды, – деді мектеп басшысы.
Айша білім алған оқу орны Алматыда үш жылдан бері жұмыс істеп келеді. Осы уақыт ішінде ең жоғары көрсеткіш 138–139 балл болса, биыл алғаш рет 140 балл шегіне жетті.
