Toyota маркалы жеңіл көліктің жүргізушісі 13 жастағы қыз баланы қағып кеткен.
Сәтбаев қаласында болған қайғылы жол-көлік оқиғасына байланысты жауапты тұлғаларға шара қолданылды. Атап айтқанда, қала әкімінің орынбасары жолдағы қауіпсіздік талаптарын сақтамағаны үшін әкімшілік жауапкершілікке тартылды. Бұл туралы Ұлытау облыстық полиция департаментінің баспасөз қызметі хабарлады.
Қайғылы оқиға 16 маусым күні жаяу жүргіншілер өткелінде болған. Toyota маркалы жеңіл көліктің жүргізушісі 13 жастағы қыз баланы қағып кеткен. Өкінішке қарай, бала алған ауыр жарақаттарынан оқиға орнында көз жұмды.
Аталған факті бойынша сотқа дейінгі тергеу басталып, көлік жүргізушісі уақытша ұстау изоляторына қамалды.
Оқи отырыңыз: Сарапшы: Жастардың 85%-ы өзінің қай мамандыққа икемі барын білмейді
Полиция департаментінің мәліметінше, жаяу жүргіншілер өткелінде тиісті жол белгілерінің болмауы апатқа себеп болған негізгі факторлардың бірі ретінде қарастырылып отыр. Бұған дейін жергілікті атқарушы органға жол белгілерін орнату жөнінде нұсқама жолданғанымен, тиісті шаралар уақытылы қабылданбаған.
Қазіргі уақытта тергеу жұмыстары Ұлытау облыстық ПД басшылығының бақылауында. Құқық қорғау органдары кінәлі тұлғаларды заң аясында жауапқа тарту үшін барлық қажетті шараларды қабылдап жатыр.
