Жылдық жоспардың 97,2%-ы орындалды .
Қаржы министрі Мәди Такиев 2024 жылы республикалық бюджетке 19,6 трлн теңге түскенін айтты, деп хабарлайды inbusiness.kz сайты.
"Республикалық бюджеттің кірістері жылдық жоспардан 97,2% орындалып, бюджетке 19,6 трлн теңге түсті. Оның ішінде, республикалық бюджеттің меншікті кірістері – 13,5 трлн теңге. Жоспар 608,6 млрд теңгеге орындалмады", – деді ведомство басшысы Мәжілістің жалпы отырысында.
Кірістер бойынша түсімдердің төмендеуіне бірқатар факторлар әсер еткен.
"Біріншіден, әлемдік геосаяси жағдайға байланысты кейбір өндіріс көлемінің қысқаруы мен логистикалық шығындардың өсуіне байланысты, 188 ірі кәсіпорын бойынша түсімдер 1,4 трлн теңгеге азайды. Екіншіден, бюджет есебінен 1 трлн 216 млрд теңге сомасында қосылған құн салығын рекордты мөлшерде қайтару орын алды, бұл 2023 жылмен салыстырғанда 3 есе көп", – деді Мәди Такиев.
Бұдан басқа 5 айдың ішінде қосылған құн салығы 673 млрд теңгеде қайтарылады.
"Есепті жылы негізгі экспорттық металдар бағасының құбылмалығы сақталды. Мысалы, мырыш бағасы 22%-ға, алюминий 8%-ға төмендеді. Төртіншіден, үшінші елдерден келетін импорт көлемі 2,0 млрд долларға азайды", – деді Қаржы министрі.
