Түркістан облысының қылмыстық істер жөніндегі мамандандырылған ауданаралық соты Түлкібас ауданының 17 жастағы тұрғынын аса ірі көлемде психотроптық заттарды таратқаны үшін 7 жылға бас бостандығынан айырды.
Тергеу барысында Мынбай ауылында тұратын жасөспірім Telegram-арналары арқылы есірткі бизнесін ұйымдастырушылармен байланыс орнатып, бірнеше ай бойы Шымкент және Сарыағаш қалаларында есірткі курьері ретінде жұмыс істегені анықталды.
Қылмыстық схемаға психотроптық зат — меткатионды (мефедронның аналогы) алу және буып-түю, орау материалдарын сатып алу, әртүрлі мекенжайларға "қалта" жасау және арнайы шифрланған байланыс арналары арқылы есеп беру кіреді.
Төлем криптовалюта арқылы жүргізіліп, P2P-сервистер арқылы теңгеге аударылған.
Күдіктіден 29 орам есірткі және тағы 26 орамда 41 "қалта" табылып, тәркіленді. Жалпы салмағы 136 грамнан асады.
Прокуратура ескертеді: аса ірі көлемде және қоғамдық орында жасалған есірткі саудасы ауыр қылмыс болып табылады және қатаң жазаға әкеп соғады.
