Анасына да әлеуметтік көмек қарастырылған.
Еңбек және халықты әлеуметтік қорғау министрі Светлана Жақыпова елордада автобус апатынан зардап шеккен Алуаға қандай әлеуметтік көмек берілетінін айтты, деп хабарлайды inbusiness.kz сайты.
Тілшілер автобус апатынан зардап шеккен қызға қандай әлеуметтік көмек қарастырылғанын айтты.
"Оның анасымен сөйлестік. Протездеу және оңалту бойынша қызметтердің барлығын өзіміздің мойнымызға аламыз. Қыз бала Егіндікөлдегі аудандық емханаға тіркелген. Дәрігерлер жеке оңалту бағдарламасын әзірлейтін болады", – деді ведомство басшысы Мәжіліс кулуарында.
Министр кішкентай Алуа алатын жәрдемақы көлеміне де тоқталды.
"Бірінші топ мүгедектігі бойынша тағайындалатын жәрдемақы мөлшері 100 мың теңгеден асады. Ал анасына мүгедектігі бар баланы тәрбиелеп отырғаны үшін 78 мың теңге қарастырылған. Бұдан басқа анасы көпбалалы отбасы ретінде басқа да төлемдер алып отыр", – деді Светлана Жақыпова.
Ведомство басшысы қазір министрліктің бұйрықтарына өзгерістер енгізіліп жатқанын айтты.
"Мемлекеттік органдардан келісім рәсімінен өтіп жатыр. Құжатқа сәйкес, Алуада сияқты ампутация болған жағдайда өмір бойына өзінің мүгедектігі бойынша растама бермеу туралы тармақ бар", – деді министр.
