"Атамекен" палатасы жүргізетін "Іскерлік климат" рейтингінде Ұлытау облысы 2025 жылдың І тоқсаны бойынша жоғары нәтижеге қол жеткізіп отыр.
Биыл аймақ орта бизнесті дамыту жөнінен 8 орынға көтерілді, деп хабарлайды inbusiness.kz сайты.
Өткен жылдың қорытындысы бойынша өңірдің көшбасшылық позицияларын иеленгенін атап өткен жөн. Осылайша, нәтиже өңірде кәсіпкерлікті дамыту бойынша жүргізіліп жатқан саясаттың тиімділігін көрсетеді.
Орта бизнес бойынша да айтарлықтай ілгерілеу байқалады: облыс 2024 жылы 15-орында болса, биылғы І тоқсанда 8-орынға көтерілді. Атап айтқанда, шағын бизнесті дамыту және мемлекеттік қолдау шараларының қолжетімділігі бойынша I орынға ие болды.
Сондай-ақ мемлекеттік органдармен мәселелерді шешудің "бейресми тәсілдеріне" салыстырмалы түрде төмен тәуелділігін көрсетеді. Бұл нәтиже – өңірдегі кәсіпкерлік инфрақұрылымның нығайып, орта бизнеске қолайлы жағдайлар жасалып жатқанын көрсететін маңызды жетістік.
