Марқұмның әпкесі күдіктіге ең ауыр жаза беруді сұрап отыр.
Шымкентте 17 жастағы студент қызды азаптап өлтірді деп айыпталған 20 жастағы жігіттің ісі сотта қаралып жатыр. Алғашқы сот отырысы өтіп, мемлекеттік айыптаушы күдіктіге тағылған ауыр айыпты жария етті, деп хабарлайды 31-арнаның "Информбюро" ақпараттық бағдарламасы.
Тергеу мәліметіне сүйенсек, айыпталушы марқұммен бұрынғы қарым-қатынаста болған. Мемлекеттік айыптаушының айтуынша, ол қылмысқа қызғаныштан барған. Сотта оқылған айыптау актісінде жасалған әрекеттердің аса қатыгез сипатта болғаны баяндалды.
"Сол жақ көкірек тұсына бір рет, арқа тұсынан екі рет соққы жасаған. Ерланқызының өлгеніне сенімді болу үшін оның мойын аймағына пышақпен бірнеше жарақат салып, өлгеніне көз жеткізген. Осыдан соң Тойлыбай өзінің қылмыстық әрекетін тоқтатпастан, жәбірленушінің киімдерін толық шешіндіріп, жалаңаш денесіне қарап отырған", – деді мемлекеттік айыптаушы Әскербек Пошимов.
Прокурордың айтуынша, күдікті қылмысқа алдын ала дайындалған – базардан арнайы пышақ сатып алып, марқұмды университеттен алып кеткен. Қала шетіне апарып, пышақтап өлтіріп, мәйітті қорлаған. Бұған қоса, бұл әрекетін видеоға түсіріп алған. Кейін марқұмды қапқа салып, елдімекен сыртындағы жерге апарып тастаған.
Оқи отырыңыз: "Немеремді өлтіргендердің түріне қарау оңай емес". Шерзат Полаттың әжесі сотта жауап берді
Қайғылы оқиға 12 наурыз күні болған. Қыздың жоғалғанын байқаған ата-анасы бірден полицияға жүгінген. Іздеу жұмыстары нәтижесінде бір тәулік ішінде күдікті де, мәйіт те табылған.
Қайғыдан қан жұтқан отбасы қылмыскерге ең ауыр жаза қолдануды талап етіп отыр.
"Ол заң факультетінде оқитын. Әлі бірінші курстың студенті еді. Жаңалықтан қанша қыздың тағдыры тапталып жатқанын естіп, "Мен елімде мұндай әділетсіздікке жол бермеймін, қыздардың намысын қорғаймын" деп армандайтын. Юрист боламын, адвокат боламын деп үміттеніп жүрді. Сіңілімнің үмітін үзген қылмыскердің жазасыз қалмауын сұраймын. Ол өмір бойына бас бостандығынан айырылуы тиіс", – деді марқұмның әпкесі Аружан Ерланқызы.
Сот процесі жалғасып жатыр. Қоғам назарын аудартқан бұл іс бойынша шешімді алқабилердің қатысуымен сот қабылдайды деп күтілуде.
