Өткен жылы Қазақстан мен Қытайдың туризм саласындағы ынтымақтастығы жаңа деңгейге көтерілді. Отандық туризмнің Қытайдағы жылы тек рәміздік бастама емес, екі ел арасындағы гуманитарлық және экономикалық байланыс­ты нығайтудың нақты құралына айналды. Бұл кезеңде мәдени дипломатия , өңірлік бірлескен күш-жігер негізінде ауқымды жұмыс жүргізілді.

Жыл бойы Бейжің, Шанхай, Сиань, Үрімші, Гонконг қала­ларында Қазақстан өңірлерінің туризм күндері, тақырыптық апталық пен ауқымды мәдени іс-шаралар ұйымдастырылды. Еліміз халықаралық туризм алаңдары – COTTM, ITB China, ITE Hong Kong көрмелерінде лайықты деңгейде таныстырылды. Бұл өз кезегінде шетелдік серіктестермен жаңа іскерлік байланыс орнатуға және елдің туристік брендін ілгерілетуге мүмкіндік берді.

Мәдени бағдарлама да маз­мұн­ды болды. Шаньдун және Хэбэй провинцияларында қазақ өнер­паздарының қатысуымен үлкен концерттер өтті, ал «Алтын адам» және «Ұлы дала» көрмелерінде Ұлттық музейдің бірегей жәдігерлері қытайлық көрерменге ұсынылды.

Ірі оқиғалық жобалар да назардан тыс қалған жоқ. Жібек жолы бағытындағы автокеруендер, Peking–Paris Motor Challenge раллиі және мото-турларға 500-ге жуық адам қатысып, аймақтың тарихи-мәдени байланыстың өзектілігін айқындай түсті.

Ақпараттық науқан ауқымды нәтижеге қол жеткізді. Ресми мәліметтерге сәйкес, Қазақстан туризмінің Қытайдағы жылы 1,8 млрд қаралым жинаса, әлеуметтік желілерде ел туралы жарияланымдарды 160 млн адам көрген. Бұл – елдің халықаралық ақпараттық кеңістіктегі беделін арттыруда айтарлықтай жетістік.

Нақты нәтижелер де байқал­ды: Қытайдан Қазақстанға келетін туристер саны 50%-ға өсті, ал елі­міз Қытай азаматтары үшін танымал туристік бағыттар рейтингісінде 40-орыннан 29-орынға көтерілді. Бұған 2023 жылғы 10 қарашадан бастап күшіне енген визасыз режім айтарлықтай үлес қосты. Қазақстан – Орталық Азия елдері ішінде Қытаймен мұндай келісімге қол жеткізген алғашқы мемлекет.

2025 жыл Қытай туризмінің Қазақстандағы жылы болып жарияланды. Бұл бастама екіжақты ынтымақтастықты одан әрі дамытуға жол ашады. Ел азаматтарының Қытай мәдениеті мен туризм бағыттарына қызығушылығы артады деп күтіледі. Сонымен қатар туристік инфрақұрылымды жетілдіру мен мәдени ықпалдастықты тереңдету мәселелері өзекті бола түседі.

Осылайша, Қазақстан мен Қытай арасындағы туристік ынтымақтастық гуманитарлық әрі экономикалық мақсаттарды ұштас­тыра отырып, екі ел арасын­дағы орнықты серіктестіктің маңызды құрамдас бөлігіне айналып отыр.

Бауыржан ӘУКЕН,

ҚЗСИ Азиялық зерттеулер бөлімінің жетекші сарапшысы