Қытайдағы интернет-дүкендер Бейжің университетінің аумағында орналасқан Вэймин көлінен алынған бөтелкедегі суды сатып жатыр, деп хабарлайды El.kz интернет порталы. Бұл су « даналық сыйлайды» деп көрсетілген.
South China Morning Post басылымының мәліметінше, бұл су әлеуметтік желі қолданушылары мен көптеген сатып алушылардың назарын аударған. Себебі судың рухани құндылығына сенеді екен.
500 мл бөтелке шамамен төрт доллардан (2 мың теңгеден астам) 14 долларға дейін (7 мың теңгеден астам) тұрады. Бұл – қарапайым бөтелкедегі судың бағасынан әлдеқайда жоғары. Қымбат бағаға қарамастан, өнімге деген сұраныс жоғары – оны шабыт алғысы, табысқа жетуді немесе ақылды болуды қалайтын адамдар сатып алып жатыр, — делінген мәліметте.
Судың шыққан жерінің шынайылығын дәлелдеу үшін кейбір сатушылар бөтелкелерді көлден толтырып жатқан сәтін видеоға түсіріп жариялайды.
Бейжің университеті – Қытайдағы ең беделді оқу орындарының бірі. Ол QS World University Rankings 2025 әлемдік рейтингінде 14-орынға ие болды – бұл құрлықтық Қытай мен Гонконг университеттері арасындағы ең жоғары нәтиже.
