Семейде 6-сынып оқушысын ұрып-соғу ісі бойынша жаңа мәліметтер жарияланды. Абай облысының кәмелетке толмағандар істері жөніндегі мамандандырылған ауданаралық сотының судьясы екі жасөспірімнің анасын ата-аналық құқықтарынан айырды, деп хабарлайды Zakon.kz.
Оқиға осы жылдың ақпан айында болған. Жасөспірім қыз-жігіттер тобы бір баланы жабылып ұрып, оны қорлап, мазақ еткен. Арнайы комиссия шешімімен оқиғаға қатысқан балалардың көбі арнайы мектепке жіберілді. Бес ата-анаға баланы тәрбиелеу міндеттерін тиісті деңгейде орындамағаны үшін кінә тағылды. Комиссия сондай-ақ кейбір ата-аналарды ата-аналық құқықтарынан айыру немесе шектеу туралы сотқа талап-арыз берген. Жасөспірімдердің алты ата-анасының үшеуі комиссия шешіміне шағым түсірді. Қалған үшеуіне қатысты сот отырыстары өтіп, мынадай шешімдер шықты:
"Кәмелетке толмаған қыздың анасын ата-ана құқығынан айыру туралы талап арыз қанағаттандырылды. Басқа бір кәмелетке толмағанның анасын ата-ана құқығынан айыру туралы талап ішінара қанағаттандырылды. Ал әкесіне қатысты — оны ата-ана құқығынан айырудан бас тарта отырып, тәрбиелеуге ұзақ уақыт бойы қатыспауы және алкогольді зиянды түрде тұтынуы ескеріліп, ата-ана құқығы шектелді. Аталған шешімдердің негізінде спирттік ішімдіктерге әуестік, әкімшілік жауапкершілікке бірнеше рет тартылу, наркологиялық және полиция есебінде тұру, баланы тәрбиелеуге қатыспау секілді жағдайлар қарастырылды. Сондай-ақ, кәмелетке толмағандардың ата-аналарынан алимент пен мемлекеттік баж өндіріп алынды. Қыз балалар қамқоршылық және қорғаншылық органдарының қарауында", — делінген сот үкімінде.
Үшінші іс бойынша талапкер өкілі мен жауапкер тарап – кәмелетке толмаған баланың ата-анасының экстерриториялық соттылықты қолдану туралы өтініштері негізінде істі басқа облысқа жолдау туралы шешім қабылданды.
Бұған дейін Семейде бір топ жасөспірімнің баланы жабылып сабағаны белгілі болған. Абай облысының полиция департаменті бұл жасөспірімдер арасындағы жанжал ерекше бақылауға алынғанын хабарлаған. Кейін дәрігерлер зардап шеккен баланың жағдайын баяндады.
2025 жылғы 26 ақпанда №9 мектеп директорының қызметінен босатылғаны белгілі болды. Ал оның тәрбие ісі жөніндегі орынбасарына қатаң сөгіс жарияланған.
