Жаз маусымының басты білім беру оқиғаларының бірі El Umiti CAMP- 2025 жазғы лагерінің жұмысы 16 маусымда басталды .

Жаз маусымының басты білім беру оқиғаларының бірі El Umiti CAMP- 2025 жазғы лагерінің жұмысы 16 маусымда басталды.

Лагерь El Umiti қорының бастамасымен және Нұрсұлтан Назарбаев Қорының қолдауымен қатарынан төртінші жыл ұйымдастырылып келеді. Осы уақыт ішінде Қазақстанның түкпір-түкпірінен 600-ден астам жасөспірім қатысты.

Маусымның 25-іне дейін Ақмола облысы, Зеренді ауылындағы «Сұңқар» сауықтыру кешенінде еліміздің ең белсенді 14-18 жас аралығындағы 200 мектеп оқушысы сапалы білім алып, дағдысын дамытып, шығармашылық қабілетін шыңдайды.

Лагерьдің басты бағыты – кәсіптік бағдар беру. Бағдарлама аясында әлеуметтік дағдыларды дамытуға арналған тренингтер, мобильді түсірілім бойынша тәжірибелік дәрістер, медиа мамандардың шеберлік сағаттары қарастырылған.

Лагерьге қатысушылар – El Umiti Premiasy, El Umiti Talent, Qabilet, Myn bala, Tauelsizdik dauiri, Aitys секілді ұлттық жобалардың жеңімпаздары мен финалистері. Олар еліміздің үмітін арқалаған, дарынды да талапты жас буын өкілдері.

Бағдарламада білім берумен ғана шектелмей, спорттық эстафеталар, зияткерлік сайыстар, пікірсайыстар, асық ату мен шахмат сынды ұлттық ойындар ұйымдастырылған. Бұл қатысушылардың тұлғалық дамуына, қабілетін ашуға септігін тигізеді.

Лагерьдің басты ерекшелігінің бірі мотивациялық кездесулер. Жасөспірімдер түрлі салада табысқа жеткен азаматтармен еркін форматта жүздесіп, өмірлік тәжірибе мен шабыт ала алады. Бұған дейін лагерь қонақтары қатарында әлемге танымал күш иесі Сергей Цирюльников, журналист Асаубек Айымбетов, ақын Серікзат Дүйсенғазы болған.

Сондай-ақ, лагерь бағдарламасында ашық аспан астында өтетін концерттік кеш те бар. Бұрын Мархаба Сәби, Alzabi, Ayree, Asik сынды танымал өнерпаздар өнер көрсетіп, ерекше көңіл-күй сыйлаған болатын. Биыл бұл дәстүр жалғасын тауып, концерт лагерьдің жарқын қорытындысы болмақ.

El Umiti CAMP – бұл жай ғана жазғы демалыс емес. Бұл жас ұрпақтың өсіп-өнетін, арманына қанат байлап, болашаққа сеніммен қадам басатын тағылым мектебі.