«Кохлеарлы импланттау – екі құлағы бірдей естімейтін балалардың есту қабілетін қалпына келтіруді көздейтін жоғары технологиялық ота. Міндетті әлеуметтік медициналық сақтандыру (МӘМС) жүйесінің арқасында мұндай қымбат әрі күрделі операциялар Алматыда тегін жасалып жатыр, деп хабарлайды Egemen.kz.
2025 жылы Алматы қаласында кохлеарлы имплант орнату операцияларына 2,3 млрд теңге жұмсау қарастырылған. Биылғы алғашқы 5 айда құлақ мүкісімен туған балаларға МӘМС шеңберінде осындай 36 қымбат ота жасалса, оған Медициналық сақтандыру қоры 283 млн теңгеден астам қаржы төлеп отыр.
Медициналық сақтандыру қоры Алматы қалалық филиалының баспасөз қызметі хабарлағандай, 2024 жылы көмектің бұл түрі 277 балаға көрсетіліп, оған жалпы 2,1 млрд теңге төленген. Әрбір отаның құны орта есеппен 8 млн теңгеге жетіп жығылады.
Мұндай операцияны кімдер жасата алады?
«Бұл ем-шара IV дәрежелі екі жақты кереңдікке шалдыққан, есту аппараттарының көмегі тимейтін балаларға жасалады. Диагноз асқындырмай анықталып, ота барынша ерте жасалса баланың толыққанды сөйлеп, әлеуметтік ортамен араласып кету мүмкіндігі де жоғарылай түседі», дейді мамандар.
Анар мен Айлиннің оқиғасы
Мысалы, Анар атты келіншек пен қызы Айлиннің басынан кешкен оқиға заманауи медицинаның адам өмірін қаншалықты өзгерте алатынының айқын дәлелі. Айлинге дәрігерлер кереңдіктің ауыр түрі деген диагноз қойып, кохлеарлы имплант орнатуды ұсынған. Ота жасатып, медициналық қызметтің барлық деңгейлерінен өту үшін бұл отбасы Қарағандыдан Алматыға қоныс аударған екен. Оңтүстік астанадағы №5 Қалалық клиникалық аурухана дәрігерлерінің көмегіне жүгініп, портал арқылы салалық клиникаға жатқызылған.
«Мен әуелде осындай қымбат отаны тегін жасатуға болады дегенге сене қойған жоқпын. Қазір қызымның құлағы естиді, дауыстасаң қарайды, сөйлеуді де ақырындап үйреніп жатыр. Бұл біздің отбасымыз үшін үлкен бақыт», дейді Анар.
Ота қайда жасалады?
Қазіргі таңда Алматы қаласында кохлеарлы имплантты екі мекеме – №5 Қалалық клиникалық ауруханасы мен «С.Асфендияров атындағы ҚазақҰМУ» КЕАҚ «Ақсай» балалар орталығында орната алады. Бұл клиникалардың екеуі де тиісті қондырғылармен жабдықталып, кардиохирургтерден бастап, логопед, аудиолог сынды мамандармен қамтамасыз етілген.
Операция жасату үшін не істеу керек?
Алдымен емханадағы учаскелік дәрігерге немесе ЛОР маманның кеңесіне жазылу қажет. Екіншіден, аудиометрия, КТ, МРТ сынды зерттеулерден өтіп, сурдолог маманның қорытындысын алу керек. Үшіншіден, құжаттарды толық жинап болған соң емхана мамандары науқасты «Ауруханаға жатқызу бюросы» порталына тіркейді. Аурухана диагнозды растағаннан кейін пациент өзі таңдаған клиникаға аттанады. Диагностикадан бастап медициналық оңалтуға дейінгі аралықтағы қызметтің барлық түрлері МӘМС қаражаты есебінен төленеді.
«Бұрын мүгедек деген атқа таңылып, қатарынан қалып қоятын балалардың дамып, естіп, сөйлеп, бала-бақша мен мектепке барып жүргенін көріп жүрміз. Ең бастысы – ата-аналар уақытты текке өткізіп алмай, дер кезінде жолдама алса болғаны. Операциядан кейін бала ұзақ мерзімді оңалтудан өтеді. Жоғарыдағы клиникалар да осы Алматы қаласында орналасқан», дейді Алматы қаласының штаттан тыс бас сурдологы Наиля Төлепбекова.
