Қоғам белсенділері мұны бюджет қаражатын негізсіз шашу деп есептейді.
Атыраулық шенеуніктердің шешімі қоғам белсенділері мен тұрғындарға ұнамай қалды. Себебі атқамінерлер бір ғана кішкентай аулаға 54 жаңа орындықты қаз-қатар тізіп қойған. Алайда халық оның жартысынан көбін пайдаланбайтынын айтады. Көпшілік бұл жобаны бюджет қаржысын ысырап ету деп санайды. Өйткені қалада тынығуға арналған аулалар мен саябақтар жетіп артылады дейді олар. Бұл туралы 31-арнаның "Информбюро" ақпараттық бағдарламасы хабарлады.
"Алмагүл" ықшам ауданындағы аула қазір көпшіліктің аузында. Балалар ойнайтын алаң мен футбол алаңы тұрғындардың сұранысына сай салынған. Ал орындықтар саны шектен тыс дейді жұрт. Таңдап жүріп отырса да, көп орындық шаң басып бос тұр екен.
"Алды да, арты да кілең орындық. Шынымды айтсам, мұншалықты көп орындықтың қажеті жоқ. 10-20 шақтысы жетер еді", – деді Атырау қаласының тұрғыны Жұмағали Ерғалиев.
Шенеуніктер бұл аулаға 54 орындық қойған. Қаз-қатар тізілген олар әр метр сайын орналасқан. Бірақ қоғам белсенділері мұны бюджет қаражатын негізсіз шашу деп есептейді. Себебі қалада бірде-бір орындығы жоқ аулалар жетерлік.
"Бұл дұрыс емес деп ойлаймын. Ақшаны босқа жұмсады. Басқа аулаларға жеткізуге болар еді. Мысалы, көптеген саябақта демалатын орын жоқ, орындық жетіспейді. Сонда орнату керек қой. Қалай есептеген? Соған таңғаламын", – деді қоғам белсендісі Нұрлан Жұнасов.
Ал әкімдік өкілдері барлығы "100 аула" жобасы аясында жүзеге асырылып жатқанын айтты. Орындықтарға 3 миллион теңге бөлініпті.
ЕРБОЛ АЙТҚАЛИЕВ, Атырау қалалық ТҮКШ және тұрғын үй инспекциясы бөлімі сектор меңгерушісінің міндетін атқарушы:
– Бұл отырғыштар мен қоқыс жәшіктері жобада дәл осылай көрсетілген. Бір ғана қадам емес, адам санының көп болуына байланысты осылай қарастырылды. Себебі басқа жер болмаған соң, линия бойына тізуге тура келді. "100 аула" жобасының атауы айтып тұрғандай, бұл — 100 ауланы абаттандыру жобасы.
Әкімдік өкілі жобада барлығы қарастырылғанын жеткізді. Жыл соңына дейін қалада футбол алаңдары, жаяу жүргіншілер жолдары, ойын алаңдары салынып, түнгі шамдар орнатылмақ. Сондай-ақ, тағы 99 аулаға 54 орындықтан қою да жоспарға енген.