Қазақстанда отбасылық-тұрмыстық құқықбұзушылыққа қарсы күрес туралы заңның қабылданғанына тура бір жыл толып отыр.
Осы аралықта жазаның күшейтілуі және алдын алу шараларының жаңа тәсілдері өз тиімділігін көрсетуде, деп хабарлайды inbusiness.kz сайты.
Бұл туралы Мемлекеттік кеңесші Ерлан Қарин толығырақ айтып берді. Оның сөзінше, Президент бұл мәселеге орай өз ұстанымын о бастан-ақ байқатқан.
– Президент 2024 жылғы 15 сәуірде қол қойған Әйелдердің құқықтарын қорғау және балалардың қауіпсіздігі туралы заң былтыр 16 маусым күні күшіне енді. Мемлекет басшысы билікке келген кезден бастап әйелдер мен балалардың құқығын қорғау саясатын жүйелі түрде жүргізіп келеді. Қасым-Жомарт Тоқаев тұрмыстық зорлық-зомбылыққа қарсы ымырасыз күресу өзінің мызғымас ұстанымы екенін үнемі айтып жүр, – деді ол.
Мемлекеттiк кеңесші мәселеге қатысты статистикалық деректерді бір тізіп өтті. Одан бірқатар арыздың азайғанын байқау қиын емес. Негізінен, мемлекет тарапынан қолға алынған ұйымдастыру шаралары мен құқықтық шаралардың нәтижесінде соңғы 5 жылда әйелдердің құқықтарын бұзған қылмыс саны екі есе азайыпты.
– Нәтижесінде отбасылық-тұрмыстық зорлық-зомбылық фактілері едәуір азайды. Мысалы, жыл басынан бері құзырлы органдарға тұрмыстық зорлық-зомбылыққа қатысты түскен арыздардың саны былтырғы осы уақпен салыстырғанда 20,5%-ға төмендеді. Бұған қоса ауыр және аса ауыр сипаттағы тұрмыстық қылмыстың саны азайған. Жыл басынан бергі бес айда аса ауыр тұрмыстық қылмыс 44%-ға, ауыр отбасылық-тұрмыстық қылмыс 29%-ға төмендеген. Сонымен қатар, бес айда кәмелет жасына толмағандарға қарсы жасалған жыныстық сипаттағы қылмыс саны 21,3%-ға, педофилияға қатысты қылмыс саны 40,7%-ға азайған, – деп нақтылай түсті Ерлан Қарин.
Отбасылық-тұрмыстық құқықбұзушылықты анықтау көрсеткіштері айтарлықтай артқан. Яғни, жаңа тәсіл тиімділігін көрсетіп отыр. Ресми арыз берілмесе де, өңірлерде құрылған жедел топтардың, полиция қызметкерлерінің, куәгерлердің берген деректері мен әлеуметтік желілерді сараптаудың нәтижесінде биылғы қаңтар-мамыр айларында 19 мыңнан астам оқиға анықталған.
Сол секілді, мектептерге "111" мемлекеттік байланыс орталығының QR-коды орнатылғаннан соң балалар арасындағы зорлық-зомбылық, буллинг, күрделі психикалық-эмоциялық жағдайларды анықтау көрсеткіші де көбейген. Мысалы, биылғы 5 айдың аралығында 86 мың бала осы қызмет түріне жүгінген. Балалар арасында өзіне-өзі қол жұмсамақ болған 30-ға жуық оқиға анықталып, қайғылы оқиғаның алдын аларлықтай жұмыс жүргізілген. Соңғы бес айда аталған нөмірге балалардың қауіпсіздігін қамтамасыз ету, психологиялық көмек алу және отбасылық-тұрмыстық зорлық-зомбылық фактілерін айту үшін және басқа да әлеуметтік мәселелермен 62 мың ересек адам хабарласқан. Олардың әрқайсысының өтініші мен ұсынысы толық ескерілді деуге болады.
Бүгінгі күнге дейін психологиялық көмек көрсететін 20 орталық ашылса, еліміздегі 112 қала мен ауданда отбасыларды қолдау орталықтары жұмыс істеп тұр. Биылдың алғашқы тоқсанында 34 мың отбасына әлеуметтік, психологиялық және құқықтық көмек көрсетілсе, 2 мың отбасына әлі де қол ұшын созу жұмыстары жалғасуда.
