2025 жылғы 16 маусымда ҚР Атомдық энергия агенттігі Қазақстанда алғашқы АЭС-ті салу және пайдалану кезінде экологиялық және әлеуметтік тәуекелдерді қалай азайтуды жоспарлап отырғанын айтты, деп хабарлайды Zakon.kz тілшісі.
Ведомствоның мәліметінше, бүгінде АЭС салу бойынша консорциум көшбасшысын таңдауда техникалық немесе экономикалық факторлармен қатар, экологиялық және әлеуметтік аспектілер де маңызды рөл атқарады.
"Экологиялық тұрғыдан алғанда, жеткізуші ұсынатын технология барынша қауіпсіз болып, ұлттық және халықаралық стандарттарға сай келуі тиіс. Қазіргі заманғы станциялар дүниежүзілік қауымдастық тарапынан экологиялық қауіпсіз және сенімді нысандар ретінде мойындалған. Мысалы, қуаты 2400 МВт болатын АЭС-тердің жұмыс тәжірибесіне сүйенсек, суыту мұнараларындағы булану есебінен су шығыны шамамен 63 млн текше метрді құрайды. Бұл Балқаш көлінің бетінен жыл сайын табиғи жолмен буланатын судың небәрі 0,3%-ына тең", – деп мәлімдеді ҚР Атомдық энергия агенттігінің баспасөз қызметі.
Қазақстанда МАГАТЭ және Қоршаған ортаға әсерді бағалау (ҚОӘБ) халықаралық стандарттары негізінде жан-жақты экологиялық сараптама жүргізілетіні айтылды. Бұл биоалуантүрлілікке, су ресурстарына және жергілікті қауымдастықтарға әсерді бағалауды қамтиды. Зерттеу нәтижелері бойынша техникалық шаралар, заманауи сүзу және оқшаулау жүйелері, су айдындары мен топырақты инженерлік қорғау тетіктері, сондай-ақ бүлінген аумақтарды қалпына келтіру жоспарлары әзірленеді.
"Қоғамдық тыңдаулар мен тәуелсіз мониторингке сарапшылар, мемлекеттік органдардың өкілдері және басқа да мүдделі тараптар қатысады. Бұл қауіптерді жедел анықтауға және жоюға мүмкіндік береді. Сонымен қатар, персонал мен халық үшін төтенше жағдайлар кезіндегі іс-қимылдар бойынша оқыту және ақпараттандыру бағдарламалары әзірленеді. Бұл жобаның жоғары дайындық деңгейін қамтамасыз етіп, оған деген сенімді күшейтеді", – деп сендірді ведомство.
Бұған дейін атом электр станциясының құрылысы қашан аяқталуы мүмкін екенін жазған болатынбыз.
