Дзюдошы Абиба Абужақынова әлем чемпионатының күміс жүлдегері атанды.
Отандасымыз Будапешттегі бәсекеде 48 келіге дейінгі салмақ дәрежесінде италиялық Ассунта Скуттоға есе жіберді. Ол 4 кездесу өткізіп, Марина Воробьева, Лоус Пети, Уатана Когана мен Лаура Мартинез Абелендадан басым түсті. Осылайша Абиба Абужақынова дзюдодан әйелдер арасында әлем чемпионатының үш дүркін жүлдегері атанған алғашқы қазақстандық спортшы. Бұл қазақ спортындағы тарихи сәт.
Айта кетейік, Будапештте додаға 93 елден 556 дзюдошы қатысып жатыр. Әлем біріншілігі 20 маусымға дейін жалғасады. Елімізде дзюдо спорты қарқынды дамып келеді. Соңғы жылдары жаттығулардың озық әдіс-тәсілдері енгізіліп, спортшылардың дайындық деңгейі артты. Бұл өз кезегінде олардың халықаралық аренада үлкен жетістікке жетуіне жол ашады. Мәселен, былтыр Парижде өткен Олимпиада ойындарында Елдос Сметовтің жеңісі соның айқын дәлелі. Биыл қаңтар айынан бастап ұлттық спортты жаңа деңгейге көтеру мақсатында Ресей, Италия және Жапониядан жоғары дәрежелі мамандар келді. Негізгі жаттықтырушылардың бірі итальяндық Эцио Гамбо. Ол бұған дейін Ресей командасымен елеулі жетістіктерге қол жеткізген. Ендігі кезекте өз тәжірибесімен қазақстандық спортшылармен де бөлісуде. Эцио Гамбомен бірге онға жуық білікті отандық маман жұмыс істейді.
Айбек Имашев, ҚР дзюдо федерациясының атқарушы директоры:
- Елімізде өтетін Қазақстан барысы Гранд-Слэм жарысын біз әлемдік дзюдо қауымдастығының келісім-шарты бойынша 4 жылға алған болатынбыз. Елімізде өтетін Гранд-Слем жарыстарынан тәжірибе жинаған, сол жерлерден өзіндік мүмкіндік алған спортшыларымызды әлемдік ареналарда өзін емін-еркін сезініп, жақсы өнер көрсетуіне сол мүмкіндік беруде.
