Қалалық сот бір түп қарасора өсіріп, өзі пайдалану үшін марихуана сақтаған жергілікті тұрғынды үш жылға бас бостандығынан айырды, деп жазады inbusiness.kz сайты.
Сот мәліметінше, 2024 жылдың күзінде ер адам бір дана қарасора тұқымын сатып алып, оны үйдегі ыдысқа отырғызған. Өскен соң жапырақтары мен гүлшоғырларының бір бөлігін кептіріп, алынған затты пакеттерге салып, пәтерінде сақтаған.
Ер адам бірден екі бап бойынша кінәлі деп таныды:
Біріншісі, Қылмыстық кодекстің 296-бабының 2-бөлігі (Есірткі, психотроптық заттармен, сол тектестермен өткізу мақсатынсыз заңсыз жұмыс істеу);
Екіншісі, Қылмыстық кодекстің 300-бабы, 2-бөлігі, 3-тармағы (Құрамында есiрткi заттар бар, өсiруге тыйым салынған өсiмдiктердi заңсыз егіп-өсіру).
Бірінші бап жеңілдетілген жазаларды – айыппұлдан бастап қоғамдық жұмыстарға тартуға немесе 40 тәулікке дейін қамауға алуға мүмкіндік берсе де, сот екінші бап бойынша қатаң жаза тағайындады. Осылайша тұрғын үш жылға сотталып, жазасын режимі орташа түзеу колониясында өтейтін болды.
Сотталушы өз кінәсін ішінара мойындады. Үкім заңды күшіне енген жоқ, сондықтан шағымдануына мүмкіндік бар.
