Израильдің Иранға жасаған соққысынан кейін Flydubai әуе компаниясынан бөлек Эмираттың Air Arabia әуе компаниясы Қазақстанға және тағы тоғыз елге рейстерін тоқтатты, деп хабарлайды РБК-ға сілтеме жасаған KAZ.NUR.KZ.
Басылымның әуе тасымалдаушысының мәлімдемесіне сілтеме жасай отырып хабарлауынша, ұшақтар уақытша ұшпайтын елдер қатарына Иран, Ирак, Иордания, Армения, Өзбекстан, Әзірбайжан, Грузия, Қырғызстан мен Қазақстан кіреді.
13 және 14 маусымдағы рейстер тоқтатылды. Сонымен қатар кейбір басқа рейстер кешіктірілуі немесе бағытын өзгертуі мүмкін, деп қосты компанияда.
Бұған дейін Flydubai әуе компаниясы ТМД елдеріне, соның ішінде Қазақстанға рейстерді тоқтатқанын хабарлаған болатын. Оған Таяу Шығыстағы қақтығыстың өршуі себеп болды.
Компания жағдайды жіті қадағалап, ұшу кестесін реттеп жатқанын мәлімдеді.
"Жолаушыларымызға келтірілген қолайсыздықтар үшін кешірім сұраймыз. Жолаушылар мен экипаждың қауіпсіздігі біздің басты міндетіміз болып қала береді", — деп қосты баспасөз қызметі.
Ал қазақстандық Air Astana әуе компаниясы Таяу Шығыстағы жағдайға байланысты жолаушыларға үндеу жасады – тасымалдаушы Израиль мен Иран арасындағы қақтығыстың шиеленісуіне байланысты кейбір рейстердің бағыттары өзгеретіні туралы ескертті.
Сонымен қатар Қазақстанның Авиация әкімшілігі Таяу Шығыстағы әскери іс-қимылдардың басталуы мен азаматтық авиация қауіпсіздігіне төнген қауіптің жоғары деңгейіне байланысты Иран, Израиль, Сирия, Ирак, Иордания және Ливан елдерінің әуе кеңістігінің үстінде, ішінде және оған жақын жерде ұшуларға арнайы тапсырма берілгенге дейін толық тыйым салды.
Естеріңізге сала кетейік, өткен түнде Израиль әскері Иранға соққы жасады.
Иранның ядролық бағдарламасының ең маңызды нысаны орналасқан Натанз қаласына жасалған шабуылдан кейін елде бірнеше жарылыс дыбысы естілді.
Бүған қатысты Атом энергиясы жөніндегі халықаралық агенттік басшысы түсінік беріп, Иранның ядролық нысанына соққы жасалғанын растады.
Ал Израильде төтенше жағдай жарияланды. Елдің қорғаныс министрі Кац жақын арада жауап ретінде Израиль мен оның бейбіт тұрғындарына соққы жасалуы мүмкін екенін ескертті.
Кейін ЦАХАЛ бригада генералы Эффи Дефрин Иран соңғы бірнеше сағат ішінде Израильге 100-ден астам ұшқышсыз ұшатын аппарат ұшырғанын айтты.
Иран Израильге жауап ретінде соққы жасады — Иранның мемлекеттік агенттігі жүздеген баллистикалық зымыран ұшырылғанын мәлімдеді. Зардап шеккендер бары әрі ғимараттардың қирағаны туралы хабарланды.
Қазақстанның Израильдегі елшілігі Таяу Шығыстағы жағдайдың ұшығуына байланысты сол елде жүрген отандастарымызға үндеу жасады.
Таяу Шығыстағы қақтығысқа қатысты еліміздің сыртқы істер министрлігі ресми мәлімдеме жасады.
"Қазақстан Республикасының Сыртқы істер министрлігі Таяу Шығыс өңіріндегі қауіпті әскери шиеленіске байланысты өз алаңдаушылығын білдіреді және қақтығысты БҰҰ Жарғысы мен халықаралық құқық нормаларына сәйкес тек саяси-дипломатиялық жолмен тез арада реттеуді құптайды. Қатысушы тараптарды барынша ұстамды болуға шақырамыз", - делінген Қазақстан Республикасы сыртқы істер министрлігінің мәлімдемесінде.
