Астанада Медицина қызметкерлері күніне орай саланың 60-тан астам қызметкері «Парасат» пен «Құрмет» ордендерімен, сонымен қатар «Ерең еңбегі үшін» және «Шапағат» медальдарымен марапатталды, деп хабарлайды 24kz.
Ал 10-ға жуық сала ардагеріне «Қазақстанның еңбек сіңірген дәрігері» құрметті атағы берілді. Марапаттарды Мемлекет басшысының атынан Премьер-министрдің орынбасары Ермек Көшербаев табыстады. Қазір елдегі 370 мыңнан астам азамат осы салада жұмыс істейді. Оның 271 мыңында медициналық білімі бар. Биылғы 5 айдың қорытындысы бойынша мамандар 1 миллионнан астам тұрғынға көмек көрсеткен. Ал жедел жәрдем қызметкерлері 3 миллионға жуық шақыртуға шыққан.
Ермек Көшербаев, ҚР Премьер-министрінің орынбасары:
- Медицина саласында жұмыс істейтін қызметкерлердің абыройын көтеру керек. Абырой болғанда, жастар көбі барады. Бірақ көбі дәрігер лауазымына бармайды. Лауазымдарын өзгертіп жібереді, басқа салаға кетіп қалады. Дәрігерлердің кәсіби деңгейін жоғары көтеру керек. Ол үшін тәжірибе болу керек.
Асылбек Тоғызбаев, Қазақстанның Еңбек сіңірген дәрігері:
- Дәрігерлік еңбек өтілім 50 жыл, оның 46 жылы мемлекеттік мекемеде жұмыс жасадым. Бірақ зейнетке шыққаннан кейін қарап отыра алмайсың. Халыққа қызметімді көрсету үшін жеке клиника аштық. ҚР Еңбек сіңірген дәрігер атағын алу – бұл мен үшін үлкен дәреже. Осы уақытқа дейін халыққа жасаған еңбегім, халыққа жасаған көмегім – осының барлығының бір түйіні іспетті дүние болып тұр.
