Әншінің кезекті туры аясында билеттердің бұлай жылдам сатылуы бірінші рет.
Астана және Алматы қалаларында өтетін концерт билеттерінің тез сатылуы Дженнифер Лопес менеджерлерін қатты таңғалдырған. Бұл туралы Astana Concert продюсері Малик Хасенов айтты.
Ол үкіметтің ұйымдастырушыларға министрлер кабинеті отырысында сөз сөйлеуге мүмкіндік беріп, қолдау білдіргенін атап өтті. Сол сәттен кейін билеттер тез арада сатылып кеткен.
"Мен "оқиғалар туризмі" блогын таныстырдым, және бұл жаңалықтан кейін 91 БАҚ бізді қолдады, біз оларға өте ризамыз. 8 сәуірде сөз сөйледік, 11-і күні сатылымға шықтық, үш сағат ішінде билеттер толық сатылып кетті. Айтпақшы, бұл турдағы алғашқы "жылдам сатылым" болды. Шынымды айтайын, әншінің тур-менеджменті бірнеше рет деректерді қайта тексеруді сұрады. Біз расында да барлық билет сатылғанын айттық. Олар: "Мұндай нарық қайдан шықты?", "Қазақтар кімдер?", "Неліктен олар Дженнифер Лопесті соншалықты жақсы көреді?" деп сұрады", – деді Хасенов.
Продюсер шілде айының басында Қауіпсіздік комитеті және барлық құқық қорғау органдары екі қалада кеңейтілген жиналыстар өткізетінін айтты.
"Бұл бірінші концерт соңғыға айналмауы үшін қауіпсіздік шаралары ең бірінші орында болуы тиіс. Неліктен біз басымдылық дейміз? Себебі кез келген оқиға бірден көп есе күрделенеді, өйткені бұл әлемдік деңгейдегі концерт. Сол себепті ешбір қатеге жол берілмеуі керек. Ұйымдастырушылар ретінде біз өзіміздің жауапкершілігімізді түсінеміз және мемлекет те бізбен бірге. Сонымен қатар, тағы қайталаймын, шара 100% коммерциялық негізде жүзеге асады. Бюджет ақшасы жоқ", – деді ол.
Концерт күні қалаларда барлық қауіпсіздік шаралары күшейтіледі. Дженнифер Лопестің концерті 10 тамызда Алматыдағы Орталық стадионда өтеді. Оған дейін, 1 тамызда ол Астанадағы "Астана Арена" стадионында концерт береді.
