Бұл туралы Times of India хабарлады, деп жазады inbusiness.kz сайты.
Үндістанның Ахмедабад қаласында орын алған жантүршігерлік ұшақ апатында 11A орнында отырған жолаушы аман қалғанын бас полицей растады.
– Полиция тірі қалған адамды тапты. Қазір ол ауруханада ем қабылдап жатыр. Қаза тапқандар саны нақты емес, себебі ұшақ тұрғын үйлер орналасқан аумаққа құлады. Сол себепті құрбандар саны әлі де артуы мүмкін, – деді Ахмедабад қаласының полиция комиссары Г. С. Малик ANI агенттігіне берген сұхбатында.
Апат кезінде ұшақ бортында 230 жолаушы мен 12 экипаж мүшесі – барлығы 242 адам болған. Ұшақ Мегхани ауданында құлап, жанармай мөлшерінің көп болуына байланысты алапат өрт тұтанған.
Құтқару жұмыстарына алты NDRF (Ұлттық апаттық әрекет ету күші) тобы, өрт сөндіру техникалары, жедел жәрдем және полиция бөлімшелері жұмылдырылды. Ұшақпен байланыс үзілер алдында экипаж тарапынан MAYDAY дабылы берілген.
Үндістан Премьер-министрі Нарендра Моди апатқа байланысты көңіл айтып, бұл оқиғаны "сөзбен сипаттауға келмейтін қайғылы жағдай" деп атады.
– Ахмедабадтағы бұл ауыр оқиға бәрімізге қатты әсер етті. Бұл – жүректі сыздатқан ауыр трагедия. Қазір министрлермен және тиісті органдармен байланыс орнатылып, зардап шеккендерге жедел көмек көрсету шаралары жүргізіліп жатыр, – деп жазды премьер-министр Моди X (бұрынғы Twitter) желісіндегі парақшасында.
