Қазақстандағы цифрландыру үдерістері Ұлыбритания үкіметінің қызығушылығын туғызып отыр. Еліміздегі Ұлттық тестілеу орталығы, "Азаматтарға арналған үкімет" мемлекеттік корпорациясы сияқты мекемелерде кең қолданысқа енгізілген стартап жобалардың бірін британиялық Білім мен Көлік министрлігі жоғары бағалады.
Ғалымжан Қараманұлы, тілші:
- London Tech Week — жыл сайын өткізілетін әлемдік деңгейдегі технологиялық фестиваль. Ауқымды іс-шара биыл 125 елден 30 мыңға жуық қатысушыны қамтып отыр. Мақсат — стартаптар, корпорациялар, инвесторлар және саясаткерлерді біріктіру арқылы болашақтың технологиялары мен инновацияларын талқылау.
Соңғы уақытта емтихан тапсыру кезінде микроқұлаққапты жасырын пайдалану үдерісі жиіледі. Құрылғының шағын болғаны соншалық тест қабылдаушы оны байқамай қалып жатады. Қазақстандық стартапшылар алаяқтықтың жолын кесу үшін жасанды интеллектке негізделген детектор ойлап тапты. Бірегей құрал қазір елімізде жүргізуші куәлігіне емтихан тапсыру кезінде кеңінен қолданылады. Енді оған Ұлыбританияның Білім мен Көлік министрлігі қызығушылық танытып отыр.
Ерсұлтан Ерманов, стартап жобаның негізін қалаушы:
- Бұл жобаның техникалық жағын қамтамасыз етуге жергілікті үкіметтен шамамен 100 млн фунт бөлінген. Біз оны әлдеқайда қолжетіміді ете аламыз. Бәсекелестерімізге қарағанда біздің ұсынысымыз 12 есе арзан және кей жағдайда қызметіміз де сапалырақ.
Тағы бір стартап еліміздегі 700-ден астам шығармашылық және спорттық үйірмелердің басын біріктіріп, балалардың бос уақытын тиімді өткізуге жағдай жасайды. Екі жыл ішінде жоба 500 мың доллардан астам инвестиция тартып, 3 млн доллардан аса кіріс әкелген. Енді авторлар Ұлыбритания нарығына шығуды көздеп отыр.
Лаура Ералиева, стартап жобаның негізін қалаушы:
- Жобамызды жан-жақты қолдап, қаражат құюға дайын венчурлық инвесторларды қарастырып жатырмыз. Олар үшін Орталық Азия тез өсіп жатқан нарықтардың бірі. Біздегі стартаптардың даму үдерісін үнемі сырттай бақылап отырады.
Іс-шарада Қазақстан стендіне жақындап, қызығушылық танытқан әлеуетті әріптестер көп болды. Отандық стартапшылар әлемнің түкпір-түкпірінен келген инвесторлармен бетпе-бет жүздесу жобаларды дамытуға көп мүмкіндік беретінін айтады.
Құралай Айменова, «Астана хаб» халықаралық технопаркінің өкілі:
- Қызығушылық өте жоғары. Бізге көп адамдар келіп жатыр. Жаңа серіктестерді таптық және көп адам Қазақстан туралы сұрап жатыр. IT парк, технопарк туралы сұрап жатыр.
Бхавин Шах, «Малайзия телеком» LTD өкілі:
- Бізге Қазақстандағы инновациялық технологиялардың қалай дамып жатқаны қызық. Өнімдеріңізді Малайзия нарығына шығару мүмкіндіктерін қарастарғымыз келеді.
Технологиялық апталықтың ашылуына Ұлыбритания премьер-министрі Кир Стармер де қатысты. Ол мектеп оқушыларына жасанды интеллект дағдыларын үйрету үшін қазынадан 187 миллион фунт бөлінетінін хабарлады. Жалпы жергілікті үкімет елді жасанды интеллект бойынша әлем көшбасшына айналдыруды мақсат етіп отыр. 2030 жылға қарай нейрожелілердің көмегімен өндіріс көлемін ұлғайтып, халықтың әл-ауқатын арттыруға ниетті.
Ғалымжан Қараманұлы
