Балалар тоғыз және 11 жаста.
Павлодар облысында балаларын екі күн қараусыз қалдырған ана жауапкершілікке тартылды, деп хабарлайды облыстық полиция департаменті.
Екі бала анасының қарауынсыз екінші күн үйде отырғанын полицияға көршісі жеткізген. Ол сонымен қатар балалар тоғыз және 11 жаста екенін хабарлаған.
"Учаскелік полиция инспекторлары мен ювеналдық полиция қызметкерлері бұл жерге дереу барды. Ақпарат расталды, балалар пәтерде жалғыз болды. Анасы таныстарымен бірге еңбек демалысын тойлап, балаларды қараусыз қалдырған. Балалар арнаулы әлеуметтік қызметтерге мұқтаж балаларды қолдау өңірлік орталығына уақытша орналастырылды. Олардың денсаулық жағдайы мен психоэмоционалды жағдайы мамандардың бақылауында. Анасының жүрген жері анықталғаннан кейін куәландыру жүргізілді, оның нәтижесі бойынша оның мас күйде екені расталды", – делінген хабарламада.
Балаларды тәрбиелеу бойынша міндеттерді тиісінше орындамағаны үшін анасы жауапкершілікке тартылды.
Оқи отырыңыз: Павлодарда оқушыға қол көтерген мектеп күзетшісі қызметінен шеттетілді
Сонымен бірге оның мінез-құлқы кәмелетке толмағандардың істері және олардың құқықтарын қорғау жөніндегі комиссияның отырысында қаралады, делінген хабарламада.
Полиция қызметкерлері кәмелетке толмаған балаларды қараусыз қалдыру олардың өмірі мен денсаулығына да қауіп төндіруі мүмкін екенін ескертті.
