Өңірдегі туризмді дамыту мақсатында ашылған "Шаға" жағажайы қараусыз қалды.
Кешеннің құрылысына 9 млрд-тан астам қаржы жұмсалған, деп жазады inbusiness.kz сайты.
Соның 7 млрд теңгесі игерілді. Орталық 3 жыл бұрын пайдалануға берілгенімен, құрылыстың сапасыздығынан және су тасқыны салдарынан толық іске қосылған жоқ.
Мердігер мекеме өз міндеттемелерін орындамағандықтан, оларға 1 млн теңге айыппұл салынды. Қаржы болмаған соң жағажайдың екінші бөлігінде де жұмыс тоқтап тұр.
Қазір облыстық Экономикалық тергеу департаменті бұл жобаға қатысты тергеу жүргізіп жатыр. Бір қызығы тергеу барысында кінәлі тұлғалар әлі анықталмаған. Ал облыстық Туризм басқармасының басшылығы жағажайды жалға алған мердігерлер қалпына келтіріп береді деп сенімде.
Қазіргі уақытта аумаққа рұқсатсыз кіруге шектеу қойылған. Көптің назарын аудартқан "Шаға" туристік-рекреациялық орталығы тек демалыс орны ретінде емес, аймақ үшін маңызды гидротехникалық нысан саналады. Жасанды көлдің негізгі функцияларының бірі – көктемгі су тасқынын ұстап қалу.
Шаға көлі – көлемі 2,3 миллион текше метр болатын жасанды су қоймасы. Жыл сайын бұл көлден 3,5-4,1 млн текше метр су айналымы өтеді. Көлге су тарту "Кеңсай-Қосқорған-2" су қоймасынан арнайы канал арқылы жүзеге асырылады. Ал артық суды "Шаға" су ағызу каналы және Түркістан магистралды каналы арқылы шығару көзделген.
Көлдегі су айналымын қамтамасыз ету үшін ирригациялық канал салынған. Аталған арна Түркістандағы саябақтар мен әкімшілік-іскерлік орталықтағы жасыл желектерді суаруға пайдаланылады.
