Атырау облысына қарасты Құлсары қаласында өткен демалыста болған жарылыстан зардап шеккен оннан аса кәсіпкер шығын өндіре алмай, шырылдап жүр, деп хабарлайды Almaty.tv.
Жойқын жарылыс кезінде қатты бүлінген орынның сау-тамтығы жоқ. Ғимараттағы спорт, жаттығу залы мен арнайы бөлімдер жарамсыз күйге түскен. Қазір жұмыс тоқтап тұр. Ал тығырыққа тірелген кәсіпкер өтемақыны кімнен талап етерін білмей дал. Шаш етектен шығынға батқан бизнес өкіліне әлі күнге дейін қолұшын созған ешкім болмапты.
"Төмендегі қабатта орналасқан жуыну бөлмесі, сауна, бәрі зақымданған, пайдаға аспайды. Салынып біткен сауда орталығы да үш бөліктен тұратын 2000 шаршы метрдегі футзалмен бірге ашамыз деп отырған түгел жанып кетті. Біздің кінәміз жоқ. Сондықтан шығынды өтеп берсін дейміз. Бізгебассейінді ашу керке, халықтан да сұраныс көп", – деді Құлсары қаласының тұрғыны Ақмарал Түгелбайқызы.
Апат кезінде маңайдағы тұрғындар да зардап шеккен. Аслан Қазиевтің қымбат көлігіне зақым келген көрінеді. Өрттің салдарынан автомобильдің салоны мен сырты толық отқа ораныпты. Бағалаушылар шығын көлемін шамамен 7-8 миллион деп есептеген.
"Көлік мүлдем жарамай қалды, сырты толық өртеніп кеткен. Қыздырғанда компьютерлерінде ақау бар. Көлік банкте кепілдікке қойылған", – деді Құлсары қаласының тұрғыны Аслан Қазиев.
Қазір арнайы құрылған комиссия жанар-жағармай құю бекетіне қатысты мәселені май-шаммен қарап жатыр. Алдын ала болжамға сүйенсек, бекеттің заңсыз жұмыс істеуі мүмкін. Мұны төтенше жағдайлар департаментінің өкілдері айтып отыр. Істің ақ-қарасы тек тергеуден соң белгілі болмақ.
"Заңды-заңсыз жұмыс жасағаны нақты анықталды. Жауапты тұлғалар кінәлілерді анықтап берді. Алдын ала зерделеу барысында газ құю бекеті заңсыз жұмыс жасаған деп айтуға болады", – деді Төтенше жағдайлар департаменті бастығының орынбасары Сырым Жаймағанбетов.
Ал полиция аталған оқиғаға қатысты қылмыстық іс қозғап, арнайы сараптама тағайындаған.
"Құлсары қаласындағы жанармай бекетіндегі жарылысқа қатысты қылмыстық іс тіркеліп, кешенді тергеу амалдары жүргізілуде. Өрттің шығу себептері сондай-ақ өзге де мән жайды анықтау мақсатында тараптардан жауап алынып, сараптамалар тағайындалған", — деді Полиция департаментінің баспасөз хатшысы Мейірім Ердәулет.
Талай адамды жұмыспен қамтып, қалада іс дөңгелетіп отырған кәсіпкерлер жергілікті биліктің мәселеге араласып, қираған нысандарды қалыпқа келтіруге көмектесуін сұрайды. Өйткені алда-жалда болған апаттың айналадағыларға келтірген зияны аз емес.
