АҚШ-тың Лос-Анджелес қаласының орталығында жарияланған коменданттық сағат күшіне енді. Мұндай режим енгізілуіне демонстрациялар кезінде тонау және зорлық-зомбылық фактілерінің көбеюі себеп болды.
Лос-Анджелесте миграциялық полицияның рейдтеріне қарсы шерулер бесінші күнге ұласып отыр. Осы уақыт ішінде жүздеген адам тұтқындалды. Тәртіпсіздіктерді басу үшін қалаға ұлттық гвардияның 2 мыңнан астам жауынгері мен теңіз күштерінің 700-дей сарбазы енгізілді.
Президент Дональд Трамп заңсыз миграцияны шектеу саясатын екінші мерзімге кіріскеннен кейін белсенді түрде жүзеге асыра бастады. Оның Лос-Анджлеске армияны тартуын Калифорния басшылығы қатаң сынап, мемлекет басшысын тіпті сотқа берген.
Соңғы мәліметке қарағанда, өткен тәулікте Чикаго тұрғындары да мигранттарға қарсы рейдтерге наразылық білдіріп, көшеге шығып, полициямен қақтығысқан.
Арыстан Рысбек
