Еліміз "International Space Summit 2025" халықаралық көрмесіне ұлттық стендпен қатысты .
Онда ғарыш саласындағы соңғы жетістіктер мен жаһандық даму перспективалары да таныстырылған, деп хабарлайды inbusiness.kz сайты.
Маңызы мол жиында мемлекеттік және жеке ұйымдардың өкілдері, ғалымдар, инвесторлар мен дипломаттар бой көрсетіп, ғарыш технологияларын дамыту, жетілдіру мен халықаралық ынтымақтастықтың негізгі бағыттарын талқылады.
Ел атынан форумға Қазақстанның Оңтүстік Кореядағы елшісі Нұрғали Арыстанов, "Қазақстан Ғарыш Сапары" ҰК" АҚ басқарма төрағасы Қайыржан Қожаев, "Galam" ЖШС директорының орынбасары Әділсұлтан Лепес және Ионосфера институтының директоры Серік Нұрақынов қатысты.
Форумның ашылу салтанатында сөз тізгінін алған қазақ елшісі Қазақстанның ғарыш саласына шолу жасады әрі оның ел үшін стратегиялық маңыздылығына және одан әрі даму әлеуетіне тоқталды. Сонымен қатар, ол Қазақстан аумағында орналасқан "Байқоңыр" ғарыш айлағының әлемдегі ең көне және ең ірі жұмыс істеп тұрған ғарыш айлағы екенімен мақтанатынын жеткізді.
Елші Нұрғали Арыстанов Мемлекет басшысы Қасым-Жомарт Тоқаевтың "Байқоңыр" ғарыш айлағының 70 жылдығына арналған бейнеүндеуінде соңғы онжылдықтарда жүзеге асырылған ауқымды ғарыш жобаларының ұлттық экономикаға қосқан үлесін атап өткенін, Байқоңырды халықаралық ынтымақтастық, ғылыми алмасу, туризм және білім беру орталығына айналдыруға күш жұмсап жатқанын сөз етті.
Сондай-ақ, ол "Қазақстан Ғарыш Сапары" ұлттық компаниясы корей компанияларымен отандық ғарыш инфрақұрылымы мен технологияларын дамыту саласында ең жоғары деңгейдегі келісімдер жасап жатқанын мәлімдеді. Қазақстанның Оңтүстік Кореядағы елшісі еліміздің спутниктік байланыс сияқты негізгі бағыттарға инвестиция салуды жалғастыруға мүдделі екенін жеткізді.
Бүгінде елде "KazSat" байланыс спутниктері мен "KazEOSat" жерді қашықтықтан зондтау спутниктері сәтті жұмыс істеп тұр. Олар телекоммуникациялық инфрақұрылым мен кеңістіктік мониторинг жүйесін дамытуда маңызды рөл атқарады.
Саммит барысында қазақстандық делегация іс-шараның негізгі ұйымдастырушысы "Contec Space Group" компаниясының Төрағасы Сон Хи Лимен кездесті. Онда қос тарап ынтымақтастық орнату мүмкіндіктерін талқылап, өзара іс-қимылдың басқа да перспективалық бағыттары бойынша пікір алмасқан.
Форумға қазақстандық делегацияның қатысуы Оңтүстік Кореямен инновациялық және жоғары технологиялық секторларда, нақтылағанда аэроғарыш өнеркәсібінде серіктестікті тереңдетуге бағытталып отыр.
