Еңбек және халықты әлеуметтік қорғау министрлігі Еңбек мемлекеттік инспекциясы комитетінің төрағасы Ерболат Әбілхатиннен автобус жүргізушілеріне жұмыс барысында ұялы телефон пайдалануға тыйым салуға бола ма деген сұрақ қойды. Толығырақ ақпаратта.
БАҚ өкілдері қазіргі еңбек қауіпсіздігі стандарттары смартфондар мен әлеуметтік желілер жоқ кезде әзірленгенін атап өтті – яғни, оларды пайдалануға байланысты тәуекелдер де сол кезде ескерілмеген. Осыған байланысты журналистер министрлік тарапынан бұл стандарттарға өзгерістер енгізу жоспарланып-жоспарланбайтынын сұрады. Себебі қазақстандықтар жүргізушілердің телефон қолдануына қатысты жиі шағымданады.
"Бізді автопарктердің жұмысы алаңдатады. Қазір біз жұмыс орнына, яғни қауіпсіз жұмыс орны стандартына қатысты заңнамалық актілерге өзгерістер енгізу мәселесін қарап жатырмыз. Иә, адами фактор бар – рөлде отырған адам ұялы телефон қолданбауы тиіс. Бірақ жолаушы ретінде біз өзіміз де көріп отырмыз, сол сияқты жүргізушілер жиі телефонға қарап, алаңдайды. Бұл, ең алдымен, жүргізушілердің еңбек қауіпсіздігі мен еңбекті қорғау талаптарын сақтау мәселесі. Екіншіден, бұл – жұмыс берушілердің жауапкершілігі. Олар жолаушыларды тасымалдау кезінде қауіпсіздік техникасының сақталуын қамтамасыз етуі тиіс", – деді Ерболат Әбілхатин.
Ол кейбір жұмыс берушілер табыс пен жоспарды орындау мақсатында еңбек тәртібінің өрескел бұзылуына көз жұма қарайтынын айтты – мысалы, жүргізуші ауысымын толық өткергеннен кейін қайтадан желіге шығарылады. Мұндай тәжірибе түбегейлі қайта қаралатын болады.
"Басқа қалалар туралы нақты айта алмаймын, бірақ Астанада барлық автобустар жаңа, олардың бәріне камера орнатылған – жүргізуші орнында да, салонында да. Яғни, жүргізуші телефон қолданса, оны диспетчерлік қызмет бірден көреді, және ол жүргізуші ауысымнан шеттетілуі мүмкін", – деп жауап берді Ерболат Әбілхатин.
Сондай-ақ ол жұмыс орнында телефон қолдануға тыйым салу мәселесін жұмыс берушілер қарастыруы тиіс деп санайды.
