Instagram әлеуметтік желісінде жасөспірімдердің қауіпсіздігіне бағытталған жаңа функция пайда болады.
Астанада Meta компаниясының өкілдері жаңа функцияны көпшілікке таныстырды, деп хабарлайды inbusiness.kz сайты.
Қуанышты жаңалық Цифрлық даму министрі Жаслан Мадиев пен Meta компаниясының вице-президенті доктор Саймон Милнердің Астанада өткен кездесуінде белгілі болды. Кездесу барысында Meta компаниясы 16 жасқа толмаған пайдаланушыларға арналған жаңа "Жасөспірімдерге арналған аккаунттар" функциясын таныстырды. Бұл мүмкіндік ата-аналарға балаларының цифрлық өміріне белсенді араласуға жол ашады.
Жаңа функция арқылы ата-аналар:
- баланың профилін кім көре алатынын шектей алады;
- қажетсіз контентті жасыра алады;
- пікірлер мен хабарламаларда бейәдеп сөздерді автоматты түрде бұғаттай алады;
- бейтаныс адамдардың жазбаларды көру мүмкіндігін өшіре алады.
Сонымен қатар, қосымша қауіпсіздік шаралары қарастырылған:
- түнгі уақытта хабарламалар туралы ескертулерді өшіру;
- Instagram қолдану уақытына шектеу қою мүмкіндігі.
Meta вице-президенті Саймон Милнердің айтуынша, бұл функция балалар мен цифрлық қауіпсіздік саласындағы сарапшылардың ұсыныстарына сүйене отырып әзірленген және Instagram желісіндегі жасөспірімдердің қорғалу деңгейін арттыруды көздейді.
Бұл функция халықаралық зерттеулер мен ата-аналардың сараптамалық ұсыныстары негізінде әзірленген. Жақын арада бұл мүмкіндік Қазақстандағы пайдаланушылар үшін қолжетімді болады деп күтілуде.
