Қазақстан мен Солтүстік Македония арасындағы сауда-экономикалық ынтымақтастық нығайып келеді. Астанада өткен кездесу барысында Сауда және интеграция министрі Арман Шаққалиев пен Солтүстік Македонияның сыртқы істер және сыртқы сауда министрі Тимчо Муцунски екіжақты қарым-қатынасты дамыту мәселелерін талқылады
Бұл туралы Caravan.kz медиа порталы baq.kz-ке сілтеме жасап хабарлайды.
Кездесу нәтижесінде Қазақстан фармацевтика, машина жасау, металлургия және басқа да өңделген өнім салаларында 320 миллион АҚШ долларынан астам сомаға экспорт жасауға дайын екенін мәлімдеді.
Қолымыздағы сандар екіжақты саудаға жаңа серпін беру үшін бірлескен күш-жігерді күшейту қажет екенін көрсетіп отыр. Тауар көлемінің уақытша төмендеуі – елдеріміз арасындағы экономикалық әлеуеттің зор екенін жоққа шығармайды, – деді Арман Шаққалиев.
Өз кезегінде Тимчо Муцунски Солтүстік Македонияның Қазақстандағы қатысуын күшейтуге мүдделі екенін атап өтті. Оның айтуынша, тек үкіметаралық (G2G) және үкімет-бизнес (G2B) форматтарымен шектеліп қалмай, бизнес пен бизнес (B2B) арасындағы диалогты да жандандыру қажет. Осы мақсатта жыл соңына дейін Скопьеде екінші бизнес-форум өткізілмек.
Кездесу барысында қос тарап агроиндустрия, логистика, туризм және цифрландыру салаларындағы ынтымақтастық мүмкіндіктерін де талқылады.
