Шығыс Қазақстан облысы Зайсан ауданындағы елдімекен халқы 100 пайыз ауыз сумен қамтылған. Бұл туралы аймақ басшысы Нұрымбет Сақтағанов аудан тұрғындарымен кездесуде айтты, деп хабарлайды El.kz ақпарат агенттігі.
Кездесуде облыс әкімі өңірде ауызсумен қамту жүйесін дамыту бағытында атқарылып жатқан және алдағы уақытта жүзеге асырылатын жұмыстар туралы баяндады. Оны айтуынша, Президент Қасым-Жомарт Тоқаевтың 2025 жылға қарай халықты ауызсумен 100% қамтамасыз ету жөніндегі тапсырмасы Зайсан ауданында толық орындалып отыр.
Бүгінде ауданның барлық 33 елді мекені ауызсумен 100% қамтылған. Бұл – кешенді әрі бірлескен жұмыстың нәтижесі. Алайда тек суға қол жеткізу ғана емес, оның сенімді жеткізілуі де аса маңызды, – деді ШҚО әкімі.
2023 жылы ауданда тоғыз су нысанына ағымдағы жөндеу жұмыстары жүргізілді. Бұл жұмыстар Жалши, Жамбыл, Қайнар-2, Қаратал, Сарытерек, Кеңсай ауылдарындағы су құбырлары желілерін, Жарсу ауылындағы насос станциясын, Ақарал ауылындағы жаңа құдықтарды және Аққойын ауылындағы биомодульдік станцияны қамтыды.
Бұл – күрделі жөндеу емес, бірақ өмірлік маңызы бар жұмыстар. Ауызсу – ауылдық жердегі әр отбасының күнделікті жайлылығының негізгі шарты. Сондықтан бұл бағыт – біздің жұмысымыздағы басты басымдықтардың бірі, – деді облыс әкімі.
Әкімдік ақпаратына сүйенсек, 2026 жылы тағы алты су және кәріз нысанына жөндеу жұмыстары жүргізіледі. Оның ішінде Зайсан қаласындағы су және кәріз желілерін қайта жаңарту, сондай-ақ Көгедай, Шүршүтсу, Сарыжыра, Дайыр және Қарабұлақ ауылдарындағы желілерді жаңарту жоспарланып отыр.
ШҚО әкімінің айтуынша, мұндай жобаларға ерекше назар аудару – су жүйелерінің тұрақты күтім мен жаңартуды қажет ететіндігіне байланысты. Өйткені уақыт өте келе инженерлік инфрақұрылым тозып, жарамсыз күйге түседі.
