Ұлы Отан соғысының жеңіспен аяқталғанына 80 жыл толуына орай Батыс Қазақстан облысында кең ауқымды тарихи-өлкетанулық іс-шара өтті, деп хабарлайды El.kz интернет порталы.

Атап айтқанда, 3-5 маусым күндері аралығында облыстық балалар мен жасөспірімдер туризм және экология орталығы мен Жәнібек аудандық туризм және экология орталығының ұйымдастыруымен облыстық «Ақжайықтану» туристік-өлкетанулық экспедициясы ұйымдастырылды.

Экспедицияның басты мақсаты — жас ұрпақты патриоттық рухта тәрбиелеу, тарихи санасын қалыптастыру, сонымен қатар Жәнібек ауданының Ұлы Отан соғысы жылдарындағы тарихын, ардагерлердің өмір жолын, жергілікті ескерткіштер мен тұлғаларды таныту болды.

Экспедицияға 21 білім алушы мен 3 жетекші қатысты. Маршрут бағыты: Орал қаласы – Чапаев ауылы – Ақпәтер ауылы – Ұзынкөл ауылы – Жәнібек ауылы – Орал қаласы.

Сапардың алғашқы күні қатысушылар Ақпәтер тарихи-өлкетану музейінде болды. Бұл музейде ауыл өмірі, ұлттық салт-дәстүрлер және көне тұрмыстық жәдігерлермен қатар, ашық аспан астындағы көрмеде ХІХ–ХХ ғасырлардағы ауыл шаруашылық техникалары ұсынылған.

Ұзынкөл және Т. Жароков атындағы мектеп музейлерінде, сондай-ақ бауырластар зираты мен су мұнарасының тарихымен танысқан оқушылар нақты тарихи деректермен сусындады. Батырлар ескерткішіне тағзым жасап, Мәңгілік алауға гүл шоқтары қойылды.

Экспедиция барысында «Жаралы Жәнібек» деректі фильмі көрсетіліп, «Жеңіс жолымен» атты квест ұйымдастырылды. Ардагерлермен кездесулер өткізіліп, олардың естеліктері жазылып алынды.

Табиғат аясында бивуак ұйымдастырылып, оқушылар дала жағдайына бейімделу машықтарын игерді. Сонымен қатар ұлттық рух пен салауатты өмір салтын насихаттау мақсатында «Жайлау» этнотуристік кешенінде садақ ату, атқа міну секілді спорттық шаралар да өткізілді.

Экспедиция нәтижесінде:

  • Жәнібек ауданының Ұлы Отан соғысы жылдарындағы тарихына қатысты деректер жинақталды;
  • Кеңес Одағының Батырлары мен майдангер қыздар туралы мәліметтер толықтырылды;
  • Оқушылар ескерткіштер мен музейлерге барып, тарихи тұлғалармен танысты;
  • Іздестіру-зерттеу жұмыстары жүргізіліп, ауызша тарих элементтері тіркелді.

Экспедиция өз мақсатына толық жетті. Қатысушылар туған өлкесіне деген сүйіспеншілігін тереңдетіп, тарихқа жаңа көзқараспен қарауға мүмкіндік алды. Мұндай жобалар жас буынды отансүйгіштікке, тарихи жадыны құрметтеуге баулитыны сөзсіз.