Облыстың Жымпиты ауылында жекеменшік үйден өрт шығып бес бала қаза тапты. Өрт кешкі уақытта тұрғын үйлердің бірінде болған, деп хабарлайды Skifnews.kz ақпарат порталы.
Батыс Қазақстан облысының Сырым ауданына қарасты Жымпиты ауылында болған өрт салдарынан бес бүлдіршін көз жұмды. Бұл туралы ҚР Төтенше жағдайлар министрлігі хабарлады.
Қайғылы оқиға 3 маусым күні кешкісін тіркелген. Өрт тұрғын үйдің бір бөлмесінде тұтанған. Қызыл жалын үй ішіндегі жеке заттар мен жиһазды шарпыған. Жалын 30 шаршы метр аумақты қамтыған.
Оқиға орнына алғашқы өрт сөндіру бригадасы бес минут ішінде жеткен. Алайда өрттен зардап шеккен бес баланың барлығы ес-түссіз күйде табылған. Олар дереу аудандық ауруханаға жеткізілгенімен, өкінішке қарай, өмірлерін аман алып қалу мүмкін болмады.
Марқұмдардың ең үлкені — бес жаста. Қалғандарының жасы одан кіші болғаны хабарланды.
Қазіргі уақытта өрттің шығу себебі анықталып жатыр. Оқиға орнына облыстық төтенше жағдайлар департаментінің басшылығы, өрт-техникалық зертхана, анықтаушылар мен психолог мамандар жіберілді.
Төтенше жағдайлар қызметі тұрғындарды пеш пен электр жабдықтарын пайдалану кезінде қауіпсіздік талаптарын қатаң сақтауға шақырады.
