«Саламатты Қазақстан» медициналық пойызы Атырау облысының Құрманғазы ауданы Ақкөл ауылына келіп тоқтады. Дәрігерлер 11 күн бойы облыс аудандарын аралап, тұрғындарға тегін медициналық көмек көрсетеді, деп хабарлайды El.kz ақпарат агенттігі.
Медициналық пойыз әрі қарай Исатай, Нарын, Аққыстау, Туманное, Жамансор, Мұқыр және Сағыз станцияларына сапарлайды деп күтілуде.
Жылжымалы медициналық нысанын қарсы алуға арналған салтанатты іс-шарада аудан әкімінің орынбасары Қайрат Бөлеков сөз сөйлеп, ұйымдастырушылар мен дәрігерлерге аудан халқы атынан ризашылығын білдірді.
Бұл пойыз – еліміздің шалғай елдімекендеріндегі тұрғындарына қолжетімді медициналық және құқықтық көмек көрсету мақсатында жолға шыққан игілікті жоба. Сіздердің жанкешті еңбектеріңіздің арқасында емханаға бара алмай жүрген ауыл тұрғындары сапалы медициналық тексерулер мен кеңес ала алады,-деді Қайрат Бөлеков.
Пойызда 29 білікті дәрігер тұрғындарға медициналық қызмет көрсетеді. Олардың құрамында терапевт, хирург, педиатр, кардиолог, невропатолог, оториноларинголог, офтальмолог, стоматолог, гинеколог, уролог, рентгенолог, психолог және функционалды диагностика мамандары бар. Тұрғындар УДЗ (ультрадыбыстық зерттеу), ЭКГ (электрокардиограмма), флюорография, гастрофиброскопия, қан талдауы және өзге де тексерістерден өте алады.
Дәрігерлер еліміз бойынша барлығы 123 елді мекенге аялдап, алты ай ішінде 90 мыңнан астам адамға көмек көрсетпек. Қажет болған жағдайда шағын хирургиялық ота да жасалады.
Пойыз заманауи медициналық құрал-жабдықтармен толық жабдықталған. Мұнда ақхалаттылардан бөлек заңгер мен медиаторлар да бар. Олар еңбек дауларын шешіп, әлеуметтік төлемдерді рәсімдеуге, сот және құқықтық мәселелер бойынша кеңес береді.
