Қала әкімдігі мен автобус паркі өкілдері баланың ата-анасы және туыстарымен кездесіп, қажетті шараларды қолға алды.
Астана қаласында орын алған жол-көлік оқиғасынан зардап шеккен баланың отбасына алғашқы күннен бастап жан-жақты көмек көрсетілуде, деп жазады inbusiness.kz сайты.
Автобус паркі тарапынан сақтандыру полисі аясында 19,6 миллион теңге көлемінде төлем жүргізіледі. Қазіргі уақытта бұл бағытта заңға сәйкес рәсімдер атқарылып жатыр. Сонымен қатар, автобус паркі қосымша 10 миллион теңге көлемінде демеушілік көмек көрсету туралы шешім қабылдады.
Отбасы Ақмола облысынан болғандықтан, емделу және оңалу кезеңінде уақытша баспана жалдауға қолдау ұсынылды. Бұған қоса, баланың денсаулығына байланысты медициналық және психологиялық көмек көрсетіліп жатыр. Әлеуметтік қолдау бойынша да тиісті сүйемелдеу қамтамасыз етілуде.
Зардап шеккен қыз баланың жағдайы қазіргі уақытта тұрақты, ол бейінді бөлімшеге ауыстырылды. Оның туыстарына барлық қабылданған және жоспарланған шаралар туралы толық ақпарат берілді.
Қала әкімдігі алғашқы күннен бастап зардап шеккендерге қажетті көмекті үздіксіз көрсетіп келеді. Бұл қолдау отбасыға деген жанашырлық пен шынайы қамқорлықтың көрінісі. Әкімдік өкілдері отбасымен тұрақты байланыста болып, баланың сауығуы үшін бар күш-жігерін жұмсауда.
Сондай-ақ, ауруханада жатқан екі науқасқа да барлық қажетті медициналық және әлеуметтік көмек көрсетілуде. Олар да сақтандыру төлемін алатын болады.
