Мбаппе Франция тарихындағы ең нәтижелі футболшы атанды.
Мадридтік "Реалдың" шабуылшысы, Франция құрамасының көшбасшысы Килиан Мбаппе ұлттық құрама тарихындағы ең нәтижелі ойыншы атанды. Ұлттар лигасының жартылай финалында Испанияға қарсы өткен ойында (4:5) 26 жастағы жұлдыз пенальтиден гол соғып, бір нәтижелі пас беріп, жаңа рекорд орнатты.
Stats Foot мәліметінше, Мбаппе Франция құрамасы сапында 80 нәтижелі әрекетке (49 гол, 31 пас) қол жеткізді. Осылайша ол аты аңызға айналған Тьерри Анридің рекордын жаңартты. Анри ұлттық құрамада 123 матч өткізіп, 51 гол соғып, 27 пас берген. Барлығы 78 нәтижелі әрекет.
Ең қызығы Мбаппенің бұл көрсеткішке небәрі 84 матчта жеткені. Бұл оның тұрақтылығы мен шабуылдағы табиғи дарынының айқын дәлелі. Анриден 39 матчқа аз ойнап-ақ Мбаппе жаңа биікті бағындырды.
Жасындай жарқыраған Килианның футболдағы жолы әлі алда. Ол бүгінде Франция құрамасы сапында 50 голға жақындаған ең жас футболшы ретінде тарихқа енді. Қазіргі қарқыны мен деңгейін ескерсек, бұл рекордтар тізімінің басы ғана деуге болады.
Франция футболының жаңа символына айналған Мбаппе бүкіл бір ұрпақтың үміті мен мақтанышы. Оның есімі енді тек Францияның ғана емес, әлем футболының алтын әріптермен жазылатын беттерінде мәңгі қалары сөзсіз.
