Бұл заң мобилизация кезеңінде елді қорғауға бағытталған басқарудың нақты тік құрылымын және қосымша құқықтық негізді қалыптастырады.
Сенат "Қазақстан Республикасының аумақтық қорғанысы туралы" заң мен оған ілеспе құжатты екінші оқылымда қабылдады, деп хабарлайды inbusiness.kz сайты.
"Аталған заңдардың негізгі мақсаты – қоғамдық қатынастарды құқықтық реттеу және мемлекеттік саясаттың заңдық негіздерін қамтамасыз ету. Заңдар аумақтық қорғаныстың тиімді жүйесін қалыптастыруға, жұмылдыру дайындығын арттыруға және төтенше жағдайларда халықтың қауіпсіздігін қамтамасыз етуге бағытталған. Негізгі заң аумақтық қорғаныстың мақсаттары мен міндеттерін, принциптері мен іс-шараларын айқындай отырып, мемлекеттің қорғаныс жүйесінде бөлек сала ретінде қарастырады. Осы бағытқа жеке сала ретінде заңда тиісті қаржыландыру көлемі және аумақтық әскери органдар мен бөлімдердің мәселелерін реттейтін нормалар көзделген", – деді сенатор Ғалиасқар Сарыбаев.
Сөзінше, заң жұмылдыру және әскери жағдай кезеңінде халықты және объектілерді қорғауға, аумақтық қорғаныс күштерін құруға, жұмыс тәртібін қамтамасыз етуге, жергілікті тұрғындарды қауіпсіздікті қамтамасыз ету іс-шараларына тартуға бағытталған.
Заңға аумақтық қорғанысты тиімді ұйымдастыру үшін қажетті жаңа терминдер мен анықтамалар енгізілген. "Ерікті" және "Өзін-өзі қорғауды қалыптастыру" сияқты негізгі ұғымдар мемлекетіміздің қорғаныс жүйесіне бірінші рет енгізілді.
Сондай-ақ, Қазақстан Республикасы Президентінің, Президентке тікелей бағынатын және есеп беретін мемлекеттік органдардың, Үкіметтің, Қорғаныс министрлігінің, Қарулы Күштері Бас штабының, орталық және жергілікті атқарушы органдардың өкілеттіктері, заңды және жеке тұлғалардың құқықтары мен міндеттері бекітілген.
Құжатта "Аумақтық қорғаныс күштері" деген жеке тарау бар.
Аумақтық қорғаныс күштері келесі аспектілерден тұрады:
– Құқық қорғау органдарының күштері мен құралдары;
– Қарулы Күштер, басқа да әскери бөлімдер мен құрылымдар бөлген күштер мен құралдар;
– Аумақтық әскерлер;
– Арнайы құрылымдар;
– Өзін-өзі қорғау күштері.
Аумақтық әскерлер мен өзін-өзі қорғау құрылымдарының негізгі функциялары заңның жекелеген баптарында бекітілген.
