Ұлттық компания қарызды юаньмен алуды жоспарлап отыр.
"ҚазМұнайГаз" қаржыландыруды арзандату мақсатында қытай юаніндегі облигацияларды шығару мүмкіндігін қарастырып жатыр, деп хабарлайды inbusiness.kz сайты Blomberg-ке сілтеме жасап.
"Нарықтағы жағдайға байланысты қарыз алуымыз мүмкін. Біз барлық нұсқаларды қарастырдық. Қазіргі уақытта дим сам, панда облигацияларын немесе араб елдеріндегі қарыз құралдарын сату мүмкіндігі бар", – деді басқарма төрағасы Асхат Хасенов.
Компания бірінші рет юаньмен облигация шығармақшы. Бірақ одан түскен қаражатты АҚШ долларына айырбастайды.
Дим сам (Dim sum bonds) облигациялары – Гонконгте шығарылып, Қытай материгінен тыс сатылатын юаньдағы қарыздық бағалы қағаздар. Панда облигациялары (Panda bonds) – Қытайдың ішкі нарығында шетелдік эмитенттер юаньмен шығаратын құнды қағаздар.
"ҚазМұнайГаз" топ-менеджерінің сөзінше, қазір осы дим-сам және панда облигациялары қолайлы.
Bloomberg жазуынша, қаржыландыру арзан болғандықтан Қытайдың несие нарығы халықаралық қарыз алушылар үшін қызықты болып тұр. Дональд Трамптың саясатынан кейін инвесторлар АҚШ нарығына да абайлап кіретін болды.
Елімізде осыған дейін "Бәйтерек" ұлттық басқарушы холдингі үш жылдық еурооблигацияларға өтінім қабылдауды бастаған. Холдингтің еурооблигациялары Қазақстан қор биржасы және Лондон қор биржасында (LSE) саудаланады.
