Атырау қаласында жолдардың 25 пайызы тозған. Көшелерінде көлік емес, көкейдегі күмән жүйткиді. Миллиардтаған қаржы бөлінгенімен, жұрт жамауы көп жолды, жоспары көп, нәтижесі аз жұмысты ғана көреді. Халықтың үміті жыл сайын жаңғырады, бірақ жолдар әлі сол шаң, шұңқыр әкімдік жұмысы шала, деп жазады Skifnews.kz ақпарат порталы.
Көктеммен бірге көтерілетін көне мәселе
Мәселен, Нұрсая ықшам ауданында жүргізілген жұмыстың сапасыз орындалуы салдарынан жаңбыр жауғанда су кетпей, көпқабатты үйлердің алды көлшікке айналады.
Қаланың Сәтбаев, Азаттық, Махамбет көшелері мен қала іргесіндегі Доссор тас жолы күн сайын мыңдаған көлік өтетін бағыттар. Алайда көктем келген сайын бұл көшелерде пайда болатын ой-шұқырлар қозғалысқа едәуір кедергі келтіреді. Тұрғындардың айтуынша, кей жолдар бір жыл ішінде бірнеше рет жөнделсе де, сапасы жақсармай отыр.
«Жолдың бәрін брусчаткамен жамап қойған. Ондай жол бола ма?» – дейді қала тұрғыны
«Дөңгелек жиі жарылады. Ходовка да шыдамайды. Жолдарда қауіп көп», – дейді тағы бір жүргізуші
Қыруар қаржы – күмәнді нәтиже
Биыл қаладағы жолдарды жөндеуге жергілікті бюджеттен 16 миллиард теңге бөлінді. Атырау қалалық әкімдігінің мәліметінше, жыл соңына дейін ұзындығы 9 шақырымнан асатын көшелерге орташа жөндеу жүргізіліп, 161 көшеде жаңа жол салынбақ. Сонымен қатар, 50 мың шаршы метрге ағымдағы жөндеу жасалады.
Қалалық әкімдік бұл жұмыстарды кезең-кезеңімен атқаратынын айтады. Дегенмен тұрғындар арасында бөлінген қаражаттың тиімділігіне күмән бар.
Сапа стандартынан ауытқыған жолдар
Жол сапасына жауапты “Жол активтерінің ұлттық сапа орталығы” мамандары жыл басынан бері Атырау қаласында 27 жол нысанын тексерген. Нәтижесінде, 59 сараптаманың алтауы құрылыс нормаларына сай келмейтіні анықталған.
«Анықталған кемшіліктер мердігер компанияларға жеткізіліп, түзетуге уақыт берілді. Дегенмен кейбір кемшіліктер әлі жойылған жоқ. Жол құрылысын бақылау күшейтіледі», – дейді бөлім басшысы Нұрлан Жантурин.
Облыстық деңгейде де мәселе бар
Атырау облысында биыл жалпы саны 93 жоба жүзеге асырылып жатыр. Облыстық жолаушылар көлігі және автомобиль жолдары басқармасының дерегінше, 13,3 шақырым жол жаңадан салынып, 10,4 шақырым жолға күрделі жөндеу жүргізіледі. Алайда өңірдегі тұрғындардың айтуынша, кейбір жаңа жолдар бір маусым өтпей жатып бұзыла бастаған. Бұл жол құрылысына пайдаланылатын материал сапасына, жұмыс барысындағы бақылаудың әлсіздігіне қатысты сұрақтар тудырады.
