Биыл адамзат баласының тарихындағы зардабы мен қасіреті өте ауыр, ең қанқұйлы Екінші дүниежүзілік соғыстағы Жеңіске 80 жыл толды. Неміс басқыншыларына қарсы күресте Қазақстанның қосқан үлесі ұшан-теңіз. Соғыста атылған әрбір он оқтың тоғызы елімізде шығарылса, әрбір бесінші отандасымыз майданға аттанды. Сол майдангерлердің өзі бүгінде азайып барады. Алайда ерлігі елге мұра, ұрпаққа ұран болған асыл жандар санадан сызылып, ойдан өшпеуге тиіс.
Біздің Панфилов ауылдық округі ақсақалдар кеңесінің бастамасымен Панфилов ауылында ҰОС ардагерлеріне ескерткіш орнату ерте көктемде қолға алынып, 9 мамыр Жеңіс күнінде ашылды. Бұл ескерткіш-тақтада Панфилов, Арқабай, Түзусай ауылдарынан соғысқа қатысып, бейбіт өмірде еңбек етіп қайтыс болған 178 жерлесіміздің аты-жөні жазылды.
Осы тізімнің ішінде Құдайберген Жансеріков соғыста көрсеткен ерліктеріне сай екі рет Кеңес Одағының батыры атағына ұсынылып, ала алмай қалған. Бұл майдангерге Панфилов ауылынан көше берілді. Жеңістің 80 жылдығына орай екі майдангерге көше атауын беру туралы аудан әкімінің атына ұсыныс берілді. Осы ескерткіштің орнатылуына демеушілік жасаған кәсіпкерлер мен жалпы жұртшылыққа ризашылығымызды білдіреміз.
Майдангерлердің есімі қашалып жазылған ескерткіш жанында «Ерлік – елге мұра, ұрпаққа ұран» атты салтанатты жиын өтті. Іс-шараның ашылу рәсімінде Алматы облысының құрметті азаматы Нұрсейіт Құдықов, Панфилов ауылдық округінің әкімі Дулат Даулеталиев, әкім орынбасары Сауле Мықтыбаева, Панфилов ауылдық ақсақалдар кеңесінің мүшесі Султан Низамов лебізін білдірді. №33 орта мектеп ұжымы концерттік бағдарлама ұсынды. Іс-шара соңында қонақтар мен ауыл тұрғындары ескерткішке гүл шоқтарын қойды. Гүл шоқтары Панфиловтың да бюстіне қойылып, құрмет көрсетілді.
Осындай тағылымды іс-шара округ аумағындағы Жібек Жолы, Қарабұлақ, Төңкеріс ауылдарындағы майдангерлерге арналған ескерткіштердің де жанында өтті.
2024 жылдың ақпан айында №17 орта мектепте өткен басқосуда Жеңістің 80 жылдығына дайындық туралы әңгіме қозғалған еді. Жиында ғалым, профессор Лейла Ахметова мен ҚХА мүшесі, этномедиатор Жұмақыз Бұтабаева біздің ескерткіш орнату туралы ұсынысымызды қолдап, жобаға қосқан еді. Осы кісілердің ұйытқы болуымен ардагерлердің аты-жөндерін нақтылап, тізімге қосу жұмыстарын бастап кеттік. Бірлесіп атқарған жұмыстың нәтижесінде бұрынғы ескерткіштің жалғасы ретінде жаңа ескерткіш орнатылды.
Батыр бабаларымыздың қаһармандық рухы ұрпақтан-ұрпаққа өнеге болады деп санаймыз. Ерлік ешқашан ұмытылмайды.
Абай ЖҰРЫНОВ,
Панфилов ауылдық ақсақалдар кеңесінің төрағасы
Алматы облысы,
Талғар ауданы
